Boris Johnson, fyrrverandi forsætisráðherra Bretlands, segir að Vladimír Pútín Rússlandsforseti hafi hótað að drepa hann þegar Johnson hvatti hann til þess að hætta við árás á Úkraínu.
Þetta er meðal þess sem kemur fram í viðtali við Johnson sem sýnt verður í heimildaþættinum Putin v the West sem er á dagskrá BBC í kvöld.
Johnson segir að hótunin hafi átt sér stað í símtali þeirra tveggja eftir að hann heimsótti Úkraínu í fyrra og fullvissaði Volodómír Selenskí, forseta Úkraínu, að Úkraínumenn hefðu stuðning Breta ef til innrásar Rússa kæmi.
Á þessum tíma var Pútín búin að senda þúsundir hermanna að landamærum Úkraínu en nokkrum vikum síðar réðst herinn inn í landið.
Johnson er sagður hafa varað Pútín við því að ef Rússar réðust inn myndi það hafa slæmar afleiðingar í för með sér fyrir Rússa, meðal annars viðskiptaþvinganir og aukinn viðbúnað NATO-ríkjanna. Þá kveðst hann hafa reynt að fullvissa Pútín um að Úkraínumenn væru ekki á leiðinni inn í NATO.
Johnson segir að á einum tímapunkti í samtali þeirra hafi Pútín hreinlega hótað honum lífláti. „Hann sagði: „Boris, ég hef engan áhuga á að meiða þig, en með flugskeyti tæki það bara eina mínútu.“
Forsætisráðherrann fyrrverandi segir að Pútín hafi verið rólegur í samtalinu og líklega viljað koma með krók á móti bragði þegar Johnson hvatti hann til að hætta við innrásina. Óvíst sé hvort alvara hafi verið að baki hótuninni en í ljósi sögunnar sé full ástæða til að taka öllum slíkum orðum alvarlega.
Í heimildaþættinum kemur fram að níu dögum eftir samtal þeirra Johnsons og Pútíns, þann 11. febrúar, hafi Ben Wallace, varnarmálaráðherra Bretlands, flogið til Moskvu til að hitta kollega sinn, Sergei Shoigu. Á þeim fundi hafi Shoigu fullyrt að Rússar ætluðu ekki að ráðast á Úkraínu. Johnson segir að bæði Bretar og Rússar hafi vitað að um lygi væri að ræða sem síðar kom á daginn.
