Pétur Odd­bergur Heimis­son og Erin Jade Turner standa fyrir prjóna­kvöldi á KEX næsta mið­viku­dags­kvöld þar sem prjóna á litla poka fyrir áströlsk poka­dýr sem berjast nú fyrir lífi sínu vegna skógar­eldanna þar í landi. Meira en 500 milljón dýr hafa látist í þeim miklu skógar­eldum sem geisa þar.

„Það er Erin, sem er áströlsk, sem fær þessa hug­mynd og kemur til mín því að ég er búinn að vera skipu­leggja þessi prjóna­kvöld á KEX,“ segir Pétur í sam­tali við Frétta­blaðið. Það voru dýra­verndunar­sam­tök í Ástralíu sem óskuðu upp­runa­lega eftir að­stoð fólks við að fá poka fyrir dýrin. „Erin er hluti af Face­book-hópi þar sem er verið að biðja um þetta,“ segir hann.

Pétur Odd­bergur Heimis­son og Erin Jade Turner standa fyrir prjóna­kvöldinu næstkomandi miðvikudagskvöld.
Mynd/Sebastian Ryborg Storgaard/Oliver Ford

„Þetta er fyrir poka­dýr, eins og litlar kengúrur sem vantar móður­kviðinn. For­eldrarnir hafa kannski dáið í elds­voðunum. Þannig að hug­myndin er sú að það er verið að prjóna poka sem dýrin eru sett í,“ segir Pétur þegar hann er spurður hvernig pokarnir verði notaðir.

Býst við góðri mætingu

Það er þó ekki þannig að dýrin verði sett í lopa­pokann einan heldur verður saumaður bóm­ull inn í þá þegar þeir eru komnir til. „Erin fer til Ástralíu í febrúar og mun koma þeim til skila,“ segir Pétur en ef magnið verður slíkt að Erin getur ekki ferðast sjálf með pokana verður leitast eftir að senda pokana á annan hátt.

Hugmyndin er sú að pokarnir líkist móðurkviðnum.
Mynd/Little Dandelion

Hann býst við góðri mætingu á prjóna­kvöldið og segist finna fyrir miklum á­huga. „Ég held það sé alveg slatti. En svo er ég búinn að fá einka­skila­boð frá fólki sem kemst ekki á mið­viku­daginn og er að spyrja hvort að það geti komið pokunum til okkar.“ Þeir sem ekki sjá sér fært að mæta á mið­viku­daginn geta komið pokum til skila á Kex milli klukkan 10 og 20 þann þriðja febrúar.

Pétur segir að prjónað verði eftir einni upp­skrift, í tveimur stærðum. „Við hugsum um að hafa þetta bara sem ein­faldast.“ Að­spurður segir hann að vanur prjónari væri lík­lega ör­fáa klukku­tíma að prjóna einn poka, „jafn­vel bara tvo þrjá.“ Magnið skiptir hann hins vegar ekki öllu máli, þó að hann myndi vilja fá sem mest. „Þó að við myndum bara fá fimm poka, þá er það alla vega eitt­hvað.“