Pósturinn hefur orðið var við umræðu og fyrirspurnir um óumbeðin bréf frá Salómonseyjum sem hafa borist Íslendingum undanfarnar vikur. Umræður hafa skapast um bréfin sem eru stundum tóm en greiða þarf lausnargjald til að fá bréfið í hendurnar.

Markaðsstjóri Póstsins, Kristín Inga Jónsdóttir, segir í svari við fyrirspurn Fréttablaðsins að það megi að öllum líkindum rekja bréfin til fyrri viðskipta af heimasíðunni Ali Express sem Íslendingar eru duglegir að nota.

„Við hjá Póstinum erum meðvituð um málið og góðu fréttirnar eru þær að hér er ekkert hættulegt á ferð. Pakkar frá Ali Express eru sendir í gegnum Salómonseyjar þar sem það er ódýrasta leiðin til Íslands. Ef einhverjir hafa keypt vöru á Ali Express á síðastliðnum 1-2 mánuðum eru allar líkur á að um sé að ræða pakkann sem viðkomandi pantaði,“ segir Kristín Inga Jónsdóttir, markaðsstjóri Póstsins.

„Ef viðskiptavinir sjá á Mínum síðum Póstsins eða í appinu að sendingin sem þeir hafa fengið tilkynningu um er óvenju létt gæti verið gott að hafa samband við þjónustuverið. Við mælum raunar með því að viðskiptavinir okkar hafi samband við þjónustuver Póstins ef þeir eru að fá dularfullar sendingar frá Salómónseyjum,“ segir Kristín enn fremur.

„Mikilvægt er að passa upp á að bera saman sendingarnúmerið sem viðkomandi fékk sent frá Ali og sendingarnúmerið í tilkynningunni frá okkur til að vera viss um að þetta sé sendingin sem beðið er eftir. Ef viðkomandi hefur fengið tilkynningu um pakka frá Salómonseyjum en er ekki að bíða eftir pakka frá Ali er gott að hafa samband við þjónustuver Póstsins og við skoðum málið.“

Þegar Fréttablaðið spurðist fyrir kannaðist lögreglan ekki við að hafa fengið slíkt mál inn á borð til sín enda fjárhæðin sem þarf að greiða til að leysa út bréfið ekki veruleg.