Miðflokkurinn birtir nú rétt í þessu yfirlýsingu vegna þess að álit ráðgefandi siðanefndar birtist á vef Alþingis í kvöld en yfirlýsinguna er að finna á Facebook og má sjá hér að neðan. 

Líkt og Fréttablaðið greindi frá komst siðanefnd á þá niðurstöðu að Klaustursmálið svokallaða falli undir gildissvið siðareglna þingsins. Í yfirlýsingu Miðflokksins segir að fjórir þingmenn flokksins hafi fyrr í dag gert athugasemd við að til stæði að birta mat nefndarinnar á eigin hlutverki á vef þinggsins í kvöld. 

„Bent var á að annars vegar væri fráleitt að birta álit áður en frestur til að skila andmælum rynni út. Slíkt gengur gegn stjórnsýslulögum. Hins vegar lægju fyrir nýjar og veigamiklar upplýsingar sem sýndu að mat siðanefndarinnar væri byggt á röngum forsendum.

„Ljóst má vera að Ríkisútvarpið hafi verið upplýst um innihald bréfsins.“

Bentu þingmennirnir á að ekki væri hægt að skilja tilkynninguna og tímasetningu tilkynningarinnar öðruvísi en að með því væri ætlunin að festa siðanefndina í farvegi sem hún hefði komið sér í, á grundvelli ófullnægjandi upplýsinga,“ en í yfirlýsingu flokksins segir jafnframt að fallist hafi verið á kröfu þingmannanna og ákveðið að hætta við birtingu greinargerðarinnar. 

Engu að síður hafi ruv.is birt frétt um málið klukkan 19:20 og er sagt í yfirlýsingunni að ljóst megi vera að Ríkisútvarpið hafi verið upplýst um innihald bréfsins. 

„Pólitískt eðli málsins er nú staðfest enn á ný og þurfti ekki frekari vitnanna við. Lög og grundvallarreglur sanngjarnrar málsmeðferðar hafa ítrekað verið brotnar við meðferð málsins. Þegar hafa allir meðlimir forsætisnefndar sagt sig frá málinu eftir að hafa gert sig vanhæfa og tveir af þremur meðlimum siðanefndarinnar vikið. Af 10 manns sem upphaflega var boðað að myndu leiða málið til lykta stendur aðeins einn eftir. Sá er fyrrverandi þingmaður og ráðherra Samfylkingarinnar.

Ljóst má vera að þau fyrirmæli sem forseti Alþingis, sem þegar hafði viðurkennt eigið vanhæfi, gaf ólöglega kjörnum varaforsetum Alþingis um meðferð málsins ráða för án tillits til laga, staðreynda, réttsýni og heiðarlegrar stjórnsýslu.“