Fyrsta tréð í skírnarskógi þjóðkirkjunnar verður gróðursett í haust. Er það ekki einn skógur, heldur margir sem kirkjan hyggst koma upp víðs vegar um landið. Verður einu tré plantað fyrir hvert barn sem skírt er í kirkjunni.

Agnes Sigurðardóttir, biskup Íslands, tilkynnti um áramót að þjóðkirkjan hygðist koma skírnarskógi á fót. Nú er kirkjuráð að útfæra hugmyndina og verður lokaniðurstaðan kynnt á vormánuðum eða í sumar. Tengist verkefnið hinni svokölluðu Grænu kirkju, umhverfisvitundarvinnu kirkjunnar.

Pétur Markan, samskiptastjóri þjóðkirkjunnar, segir að miðað við núverandi fjölda skírna séu þetta á bilinu þrjú til fjögur þúsund tré á ári. Markmiðið með verkefninu sé að tengja skírnina við umhverfisvernd og umhverfisvitund, að með hverju skírðu barni vaxi tré. Ákall sé eftir aðgerðum í umhverfismálum, sem séu jafnframt stærsta áskorun þessarar og komandi kynslóða.

„Einn af kostum kirkjunnar er að við eigum land víðs vegar um landið. Hugmyndin er að tengja ræktarlandið við hverja sókn til að hver og einn geti heimsótt skóginn á innan við klukkutíma,“ segir Pétur. Verður hvert tré merkt einstaklingnum sem skírður er. „Við erum að skoða töluvert mörg svæði sem eru vel til þess fallin að rækta skóglendi á. Á tals vert mörgum svæðum sem kirkjan á er skógrækt fyrir sem hægt er að bæta við.“ Í skóginum verður helst plantað annaðhvort birki eða furu en jafnframt tekið mið af staðháttum og hvaða tegund henti best á hverjum stað. „Við förum þó ekki af stað með þetta nema í samráði við skógræktarfélög og aðra viðkomandi fagaðila,“ segir Pétur.