Ólíkt því sem fram kemur á vefsíðunum, panamaskjolin.is og islandiallt.is, virðast þær hafa unnar af almannatenglinum Viðari Garðarssyni í samráði við Sigmund Davíð Gunnlaugsson og reikningurinn fyrir vinnuna við þær sendar á Framsóknarflokkinn þar sem þær væru hluti af kosningabaráttu flokksins. 

Á vefsíðunum segir hins vegar að þeim sé haldið úti af hópi einstaklinga úr ólíkum áttum, með ólíkar stjórnmálaskoðanir, sem eigi það sameiginlegt að vera stuðningsmenn Sigmundar Davíðs Gunnlaugssonar og eiginkonu hans Önnu Sigurlaugar Pálsdóttur. 

Í dómi sem féll í Héraðsdómi Reykjavíkur í dag kemur fram að síðurnar hafi verið settar upp af almannatenglinum Viðari Garðarssyni hjá fyrirtækinu Forystu, sem sá um ráðgjöf fyrir Sigmund Davíð í tengslum við Alþingiskosningarnar árið 2016.

Sjá einnig: Panama-ráð­gjafi Sig­mundar fær ekki greitt

Mál Viðars var höfðað gegn Framsóknarflokkinum og tapaði hann málinu fyrir dómi og var flokkurinn sýknaður af kröfum hans sem námu fimm milljónum króna rúmlega.

Í dóminum er haft eftir Viðari að panamaskjolin.is hafi verið sett upp til þess að „setja strik í sandinn og taka til varna“ en islandiallt.is til þess að „sækja fram“.

Svo virðist sem vefsíðurnar hafi verið settar upp og haldið úti í öðrum tilgangi en þar er gefið til kynna.