Páley Borgþórsdóttir hefur verið skipuð í embætti lögreglustjórans á Norðurlandi eystra. Hún tekur við starfinu 13. júlí næstkomandi. Þetta kemur fram í tilkynningu frá dómsmálaráðuneytinu.

Páley hefur gegnt embætti lögreglustjórans í Vestmannaeyjum frá árinu 2015 en hún mun nú færa sig norður. Alls sóttu fimm um stöðu lögreglustjórans á Norðurlandi eystra en hæfnisnefnd, sem skipuð var til að fara yfir og meta hæfni umsókna mat Páleyju hæfasta.

Halla Bergþóra Björnsdóttir gegndi áður embættinu en hún sagði stöðu sinni lausri fyrr í ár þegar hún tók við sem nýr lögreglustjóri á höfuðborgarsvæðinu.

Fjórir aðrir sóttu um stöðuna ásamt Páleyju; Arnfríður Gígja Arngrímsdóttir, aðstoðarsaksóknari hjá embætti Héraðssaksóknara, Halldóra Kristín Hauksdóttir, lögmaður hjá Akureyrarbæ, Hreiðar Eiríksson, lögfræðingur hjá Fiskistofu og Sigurður Hólmar Kristjánsson, saksóknarfulltrúi og staðgengill lögreglustjóra á Norðurlandi vestra.