Ó­sáttur við „ofsa­her­ferð“ Um­hverfis­stofnunar

For­maður Slysa­varna­fé­lagsins Otti Rafn Sigmarsson Lands­bjargar, segir átak Um­hverfis­stofnunar í að­draganda jóla, þar sem lands­menn voru minntir á skað­semi flug­elda og hvattir til að halda um­hverfis­vænni ára­mót með því að sleppa flug­eldum, hafi haft á­hrif á flug­elda­söluna í ár.

„Ég hugsa að þetta hjá Um­hverfis­stofnun vegi mjög þungt í okkar tölum og hefur haft ein­hver á­hrif. Við eigum eftir að gera upp alla söluna og svo er auð­vitað sölu­dagur eftir á þrettándanum, en til­finningin er að salan sé svipuð eða jafn­vel að­eins lakara en síðustu ár,“ segir Otti.

Að sögn Otta áttu for­svars­menn Lands­bjargar fund með Um­hverfis­stofnun í síðasta mánuði, meðal annars til að ræða ára­mótin. Ekkert hafi komið fram á þeim fundi sem benti til þess að stofnunin myndi beita sér á þennan hátt.

„Við fórum yfir með þeim hvað þetta er okkur mikil­væg fjár­öflun og hvaða leiðir við höfum farið til að minnka mengun og hvernig við höfum verið að bæta okkur síðustu ár. En það var ekkert talað um það að fara í þessa ofsa­her­ferð gegn okkur,“ segir Otti Rafn, og bætir við að honum þyki það fyrst og fremst leitt að stofnunin hafi kosið að fara þessa leið.

„Flug­eldar eru ekki bannaðir og þetta er ekki stefna stjórn­valda í þessu málum. Því er það í besta falli mjög skrýtið að fara fram með þessum hætti, því nú er fullt af hlutum sem menga og við vitum öll af því,“ segir Otti.

Spurður segir Otti að Slysa­varna­fé­lagið Lands­björg hafi reynt að koma til móts við þá sem vilji styrkja björgunar­sveitirnar án þess að kaupa af þeim flug­elda.

„Eitt af því sem við höfum gert er til dæmis að bjóða upp á rótar­skot þar sem við gróður­setjum tré fyrir hvert rótar­skot. Það fór rosa­lega vel af stað þegar við byrjuðum með það fyrst, en svo hefur bara verið mjög lítill á­hugi á því, sér­stak­lega síðustu tvö árin, segir Otti og heldur á­fram:

„Fólk vill bara kaupa flug­elda og sækist í þá. Þetta snýst ekki bara um að styrkja björgunar­sveitina heldur líka um hefðina og það að skjóta upp flug­eldum og upp­lifa ára­mótin, eins og Ís­lendingar hafa alltaf gert.“

Otti segir að til standi að hafa sam­band við Um­hverfis­stofnun á næstunni, bæði til að ræða átak stofnunarinnar og fara yfir stöðuna.

„Við erum ekkert að fela að flug­eldar mengi. En við viljum frekar taka sam­talið og gera betur. Eins og þegar flug­elda­salan byrjaði fyrst, þá voru augn­s­lys tíð og þá fórum við í gríðar­legt átak í notkun á flug­elda­gler­augum og höfum haldið því á lofti síðan. En við stefnum á að fara yfir stöðuna með þeim um leið og við höfum svig­rúm til,“ segir Otti.