Móðir drengs sem varð fyrir líkams­á­rás í Borgar­holts­skóla í gær segir það ekki rétt að um upp­gjör vegna fíkni­efna­skuldar hafi verið að ræða líkt og nokkrir hafi haldið fram. Hún segir son sinn aldrei hafa neytt fíkni­efna og það væri sið­ferðis­lega rangt að fjalla um ó­lög­ráða ein­stak­linga á þennan hátt.

Í færslu sem móðirin, Inda Björk Alexanders­dóttir, birtir á Face­book síðu sinni segir hún að hún hafi þegar haft sam­band við frétta­miðla sem héldu því fram að um fíkni­efna­skuld hafi verið að ræða, og farið fram á leið­réttingu en enginn hafi haft sam­band við þau áður en fréttir um málið voru birtar.

Rannsaka málið

Líkt og greint var frá í gær var sér­sveit lög­reglu kölluð út eftir að til­kynnt hafði verið um ungan mann sem hafði mætt í skólann vopnaður hand­bolta­kylfu og hníf en sex voru fluttir á slysa­deild í kjöl­farið og þrír hand­teknir.

Einn þeirra var í dag úr­skurðaður í viku­langt gæslu­varð­hald og er málið enn til rannsóknar hjá lögreglu.

Hótað barsmíðum eftir að hafa komið stelpu til varnar

Inda greinir frá því að sonur sinn hafi fyrir nokkrum mánuðum stöðvað þá sem stóðu fyrir á­rásinni í gær þar sem þeir voru að ganga í skrokk á stelpu. „Síðan þá hefur honum verið hótað bar­smíðum og í fyrra­dag barst honum til eyrna að það væri verið að plan­leggja stungu­á­rás á sig,“ segir hún í færslunni.

„Þessir drengir reyndu að narra hann út í Spöng þarna rétt hjá Borgar­holts­skóla,“ bætir hún við en sonur hennar hafði þá hringt í bróður sinn og látið hann vita. „Bróðir hans fer upp í skóla, reynir að sjatla málin við drengina en það brjótast út slags­mál þar sem þessir drengir ráðast á báða syni mína.“

Að sögn Indu eru báðir synir hennar tals­vert lemstraðir og með djúpa skurði á höfði. Annar drengur sem kom bræðrunum til varnar sé síðan hand­leggs­brotinn. „Ég bið ykkur að róa ykkur í að dæma það sem þarna fór fram, þetta er svaka­lega erfitt.“

„Ég bendi á að synir mínir voru ekki leiddir burtu frá hvorki skóla né bráða­mót­töku í járnum, þeir eru með stöðu þol­enda í þessu máli,“ segir hún. „Rétt skal vera rétt, ég er ekki mamman sem hef stungið höfðinu í sandinn þegar börnin mín eiga í hlut en ég ver þá með klóm og kjafti þegar rang­lega er að þeim vegið og með hættu­legum vopnum eins og var gert í gær.“