Upp af Þakgili suðvestur af Mýrdalsjökli eru stórkostlegar náttúruperlur sem eru flestum Íslendingum lítt kunnar. Skýringuna á því kunnum við ekki en ef til vill fælir það einhverja frá að skammt undan lúrir Katla, sem reyndar hefur ekki látið á sér kræla í 101 ár.

Það er auðvelt að komast í Þakgil frá Vík í Mýrdal en frá þjóðveginum er greiðfær 15 km akvegur. Þar bíður frábært tjaldstæði inni á milli brattra en grasi gróinna gilja. Úr Þakgili bjóðast spennandi gönguleiðir í allar áttir með útsýni sem á varla sinn líka á Íslandi. Sérstaklega er tilkomumikið að koma upp á Rjúpnagilsbrúnir, skammt frá Mýrdalsjökli, en þangað er tæplega þriggja klukkustunda ganga. Þar sést Höfðabrekkujökull steypast fram af snarbröttu klettastáli.

Ekki þarf að bíða lengi til að heyra drunur og dynki þegar ísfossar steypast hundruð metra fram af stálinu ofan í djúpan dal sem þakinn er jökli. Lagskipt ís- og klettastálið liggur í hálfhring og minnir á svalir í óperuleikhúsi, enda sannkallað náttúruleikhús. Fossar sem eru á meðal þeirra hæstu á Íslandi skreyta leikmyndina, en þeir eru merkilegt nokk nafnlausir.

Huldufjöll fyrir miðri mynd og innilokaður Hulinsdalur til hægri.
Mynd/ÓMB

Hinum megin í dalnum eru litfögur líparítfjöll sem bera dulúðugt nafn, Huldufjöll. Til að komast að Huldufjöllum er gengið niður brattar og lausar hlíðar Rjúpnafells og þaðan út á skriðjökul sem austar sameinast Kötlujökli.

Til að komast upp á jökulbrúnina þarf jöklabúnað og ofan á jöklinum er best að nota mannbrodda. Gengið er til austurs að Huldufjöllum en handan þeirra er náttúruperla í felum – sem jafnframt er einn einangraðasti staður á Íslandi, Hulinsdalur. Einangrunina getur hann þakkað úfnum skriðjöklum og snarbröttum grasi grónum fjöllum í allar áttir. Þarna þvælist sauðfé ekki og því þurfa bændur ekki að smala Hulinsdal.

Af Rjúpnagilsbrúnum bjóðast stúkusæti þar sem fylgjast má með Höfðabrekkujökli steypast fram af hengiflugi.
Mynd/ÓMB

Á leiðinni heim er tilvalið að ganga eftir Kötlujökli að upptökum Múlakvíslar. Áður en komið er þangað er hægt að þræða sig niður af jöklinum og aftur upp á Höfðabrekkuafrétt eftir bröttum en grasi grónum brekkum. Þaðan er haldið áfram að Þakgili.

Þarna er auðvelt að villast og því skynsamlegt að vera í för með staðkunnugum. Þetta er krefjandi 25 km löng ganga, en algjört augnakonfekt. Fyrir þá sem kjósa styttri göngu er hægt að ganga fram og til baka að Rjúpnabrekkugilsbrúnum á hálfum degi og berja náttúruleikhúsið augum.