Mikið er um öndunar­færa­sýkingar af völdum mis­munandi veira um þessar mundir og inflúensan og RSV eru fyrr á ferðinni en venju­lega. Þetta kemur fram í nýrri saman­tekt em­bættis land­læknis á öndunar­færa­sýkingum.

Þar kemur fram að, eins og spáð hafði verið fyrir, stefni í að þennan fyrsta vetur án sótt­varna­að­gerða muni öndunar­færa­sýkingar leggjast þungt á lands­menn.

Þá kemur fram að enn séu tölu­verð veikindi vegna Co­vid-19 og að út­lit sé fyrir að þeim muni fjölga. Eins og staðan er núna liggja 30 inni á Land­spítala vegna Co­vid-19 og einn á spítalanum á Akur­eyri. Af þeim á Land­spítala er einn á gjör­gæslu og í öndunar­vél. Fram kemur í saman­tektinni að í hverri viku séu að greinast um 210 ein­staklingar og er hlut­fall já­kvæðra sýna á milli 30 til 40 prósent sem gefur til kynna tölu­verða út­breiðslu í sam­fé­laginu.

Fleiri með in­flúensu en í fyrra

Alls hafa síðustu vikur 112 ein­staklingar greinst með in­flúensu sem er fleiri en áður, saman­borið við fyrri ár en á sama tíma í fyrra höfðu 80 greinst. Flestir eru á höfuð­borgar­svæðinu en inflúensan hefur greinst í öllum lands­hlutum.

Þá hafa í októ­ber og það sem af er nóvember 79 ein­staklingar greinst með RSV-vírus og kemur fram í saman­tekinni að í Evrópu sé sama staða uppi en að í sumum löndum megi sjá aukningu til­fella, sér­stak­lega hjá börnum yngri en fimm ára.

Nánar hér á vef land­læknis.