Íslendingar erlendis láta ekki íslenska smjörið vanta í eldamennsku jólanna. Þá er mikið pantað af laufabrauði, Ora-baunum og konfekti. Nammi.is er einn stærsti útflytjandi á íslenskum vörum og segir Sófus Gústavsson að önnur kynslóð fastakúnna sé farin að panta – jafnvel þau sem hafi aldrei komið til Íslands.

Við erum með mikið af föstum kúnnum. Nammi.is var stofnað fyrir einhverjum 24 árum og það sem við erum að sjá núna fyrir þessi jól er að önnur kynslóð er byrjuð að versla við okkur. Sú kynslóð hefur alist upp við íslenskt sælgæti en sum þeirra hafa aldrei komið til Íslands,“ segir Sófus Gústavsson, eigandi nammi.‌is, en jólavertíðin þar á bæ er löngu hafin. Íslendingar erlendis þurfa að vera búnir að panta sitt fyrir löngu til að halda gleðileg jól. Og engin jól eru gleðileg nema jólasteikin fái að liggja aðeins í íslensku smjöri. „Það er númer eitt, tvö og þrjú. Það sem er þó merkilegt er að græna smjörið, sem er ósaltað, selst meira,“ segir hann.

Hann segir að topplistinn yfir það sem Íslendingar erlendis séu að kaupa sé frekar einfaldur og hljómi eins og innkaupalistinn hjá venjulegri fjölskyldu sem fari í Nettó fyrir jólin. „Topplistinn er auðveldur. Ef við tökum kjötið burt af listanum, sem var nýlega bannað, þá er topplistinn hjá okkur laufabrauð og malt og appelsín, grænar baunir og íslenska smjörið.

Svo er það konfektið frá Nóa Síríus og síldin er að koma sterk inn,“ segir Sófus.

Það sem stingur í stúf þegar topplistinn er skoðaður aðeins neðar er harðfiskur sem fáir tengja við sem nauðsynlegan hlut um jólin. „Persónulega er ég ekki með harðfisk heima hjá mér um jólin en Íslendingar erlendis virðast elska harðfiskinn.“

Það jafnast ekkert á við að elda upp úr íslenska smjörinu – jafnvel þótt það sé erlendis.

Þótt konfektið sé vinsælt núna er Hraun og lakkrísinn frá Góu vinsælt allt árið. „Góa er alltaf með sígildar vörur og þeirra vörur eru vinsælar allt árið. Fólk er að kaupa sitt lítið af hverju úr nammideildinni en helst núna er konfektið.“

Sófus bendir á að tugþúsundir Íslendinga búi erlendis, þar af um 10–15 þúsund í Bandaríkjunum. Hann sendir mest til Bandaríkjanna en einnig til Kanada og Evrópu. „Það er erfitt að senda til Suður-Ameríku til dæmis. Mexíkó er alveg lokað og eitt og eitt land leyfir ekki neitt, eins og Nýja-Sjáland.“

Búðingur ómissandi

Fréttablaðið hafði samband við nokkra Íslendinga sem búa erlendis. Þeir áttu það sameiginlegt að kaupa Þrist, Draum, Appolólakkrís og Hraun yfir árið. Þó voru nokkrir með sínar sérþarfir, eins og pítu­sósu, kókómjólk og sumir jafnvel pöntuðu mexíkó-ost.

Fyrir jólin breytast pantanirnar og verða líkari því sem þekkist hér á Fróni. Þá er pantað hangikjöt, laufabrauð, malt og appelsín, grænar Ora-baunir og Royal-búðingur. Þá er einnig vinsælt íslenska súkkulaðið því allir viðmælendur áttu það sameiginlegt að panta suðusúkkulaði og rjómasúkkulaði en aðrir bættu jafnvel súkkulaðispæni við. Þá er fátt betra en að leyfa sér súkkulaðirúsínur til hátíðarbrigða.