Hvítserkur er eitt sérkennilegasta fjall á Íslandi, staðsett á Víknaslóðum milli Borgarfjarðar eystri og Húsavíkur. Það er 771 m hátt og sker sig úr umhverfinu, enda ljóst ásýndum með dökkum bergæðum sem liggja þvers og kruss í gegnum fjallið. Berggangarnir stefna margir að toppi fjallsins og minna á lakkrísreimar eða röndótt náttföt, enda merkir serkur ermalaus eða ermastuttur kyrtill.

Gengið upp úr þoku bakdyramegin á Hvítserk.
Mynd/TG

Annað nafn á þessu skemmtilega fjalli er einmitt Röndólfur en tveir aðrir Hvítserkir eru á Íslandi, annar er drithvítur klettur í sjó við botn Húnafjarðar og hin er foss í Fitjaá í Skorradal í Borgarfirði. Það er sérstaklega suðurhlíð Hvítserks sem er mikið fyrir augað en efst ber meira á dekkra bergi. Fjallið er myndað úr ljósu og súru líparíti en í því er einnig flikruberg, líka kallað ignimbrite. Er talið að það hafi myndast í miklu eldskýi við sprengigos og gjóskuhlaup úr Breiðuvíkureldstöðinni skammt frá. Í Hvítserk er gamalt berg sem gæti verið allt að 125-250 milljóna ára og því mun eldra en elstu hlutar Íslands sem hingað til hafa verið taldir 16 milljóna ára. Rönd­ólfur gæti því verið ókrýndur öldungur í íslenskri jarðsögu.

Horft til norðurs í átt að Breiðuvík af tindi Hvítserks.
Mynd/TG

Það er auðvelt að komast að rótum Hvítserks en frá Bakkagerði í Borgarfirði eystra liggur jeppavegur meðfram fjallinu inn að Húsavík og áfram í Loðmundarfjörð. Auðveldast er að ganga á fjallið efst af hryggnum milli Borgarfjarðar og Húsvíkur og tekur uppgangan ekki nema rúma klukkustund. Aðrar og lengri gönguleiðir eru einnig í boði, t.d. upp úr Breiðuvík og er þá gengið fram hjá fjalli sem heitir því skemmtilega nafni Hákarlshaus. Er þá komist upp á Hvítserk bakdyramegin sem er ekki síður spennandi en suðurhlíðarnar sem síðan er hægt að ganga niður að áðurnefndum jeppavegi. Undirlagið í Hvítserk er laust í sér, sérstaklega sunnan megin, og því mikilvægt að fara varlega og notast við göngustafi. Efst er frábært útsýni yfir Víkur þar sem mest ber á Húsavík, Breiðuvík en líka Dyrfjöllum og fjallinu Skúmhetti. Loks getur verið gaman að ganga kringum Hvítserk enda ótrúlega fjölbreytt og litrík náttúra í boði hvert sem litið er.