Stjórn Viðreisnar segir fréttir af skotárásum á skrifstofur stjórnmálaflokkanna og á bíl Dags B. Eggertssonar, borgarstjóra, vera hörmulegar en í yfirlýsingu um málið fordæmir stjórnin ógnanir og ofbeldi gagnvart stjórnmálamönnum.

„Meðal þess besta við að búa á Íslandi er hversu friðsælt samfélag okkar hefur verið. Lengst af hafa kjörnir fulltrúar og leiðtogar í athafnalífi getað lifað lífi sínu án ótta um líkamlegan skaða. Þannig viljum við hafa það,“ segir í yfirlýsingunni.

Líkt og greint var frá í gær er lögreglan á höfuðborgarsvæðinu nú með skotárásina á bíl borgarstjóra til rannsóknar en sjálfur sagðist Dagur vera skelkaður vegna málsins. Þá var greint frá því í síðustu viku að skotárásir hafi verið gerðar á skrifstofu Samfylkingarinnar og annarra flokka.

Umræðan sífellt ofbeldisfyllri

Stjórn Viðreisnar segir að það sé gott að sjá lögreglu taka málið föstum tökum en vandamálið einskorðist ekki við skotárásirnar.

„Umræðumenning á opinberum vettvangi fer síharðnandi og verður æ ofbeldisfyllri. Við þekkjum það úr stjórnmálalífi annarra lýðræðisríkja að ofbeldi í orði getur fljótt breyst í ofbeldi á borði,“ segir í yfirlýsingunni.

„Við þurfum að geta verið ósammála um leiðir án þess að það skipti okkur í lið vina og óvina, okkur og ykkur. Það er sameiginleg ábyrgð okkar allra að stemma stigu við hatursfullri umræðu, strax og hennar verður vart.“

Þá segir stjórnin að það sé mikilvægt að verja grunnstoðir lýðræðisins, þátttöku í hvers konar stjórnmálastarfi, frjáls frá ógnum, hótunum og ofbeldi. „Það er von okkar að viðbrögð samfélagsins alls verði með þeim hætti að árásum þessum linni þegar í stað.“