Öryrkjabandalag Íslands hefur sent frá sér tilkynningu þar sem bandalagið gagnrýnir tölfræði sem fjármálaráðherra lagði fram í minnisblaði sínu.

Á fundi ríkisstjórnarinnar í dag lagði Bjarni fram minnisblað um framlög til almannatrygginga. Fram kemur á vef Stjórnarráðsins að framlögin hafa nær tvöfaldast frá árinu 2013 miðað við verðlag hvers árs og nema nú 642 þúsund krónum á hvern landsmann aldrinum 18-67 ára.

„Í ljósi þess tekjufalls sem ríkissjóður stendur frammi fyrir vegna heimsfaraldurs kórónuveiru mun hlutfall framlaga almannatrygginga að óbreyttu nema tæpum fjórðungi tekna ríkissjóðs af skatttekjum og tryggingagjaldi á næsta ári, í stað 14-15% áður.“

Þetta telur ÖBÍ vera villandi framsetningu.

„Sem sagt, tekjur ríkissjóðs minnka, og föst útgjöld verða þar með hærra hlutfall af minnkandi tekjum. Þá er rétt að segja hlutina eins og þeir eru. Hlutfallið eykst fyrst og fremst vegna lækkandi tekna, ekki hækkandi gjalda. Framsetningin sem ráðherra velur er villandi. Og gleymum ekki kosningaloforðinu sem ráðherra gaf eldri borgurum fyrir nokkrum árum stærsti hluti aukningar útgjalda til almannatrygginga farið í að efna það. Öryrkjar hafa ekki fengið neitt."

Fjármálaráðherra birti línurit máli sínu til stuðnings. Þar má sjá hlutfall örorkulífeyrisþega, örorkustyrkþega og endurhæfingalífeyrisþega sem hlutfall af fólki á vinnufærum aldri.

„Einhverra hluta vegna tekur ráðherra þó sérstaklega út úr jöfnunni innflytjendur, eða erlent vinnuafl, eins og þessi hópur skipti engu máli í verðmætasköpun landsins. Að taka þennan hóp út, er eiginlega óskiljanlegt. Innflutt vinnuafl er jú hluti af öllum öðrum þjóðhagsstærðum, skattgreiðslum, landframleiðslu og svo mætti lengi telja."

„Ráðherra er einnig ofarlega í huga fjölgun öryrkja á tímabilinu sem hann velur sér. 4300 einstaklingar, eða jafn margir og búi í Vestmannaeyjum. Setjum þessa tölu í samhengi. Á sama tíma hefur íbúum landsins fjölgað um 45.250. Það er aðeins rúmlega íbúatala Kópavogs og Seltjarnarness."

Þá segir ÖBÍ að fjöldi öryrkja sé miðað við þetta 9,5 prósent og hafi verið 9,2 prósent undanfarin ár. Munurinn sé ekki nema 0,3 prósentustig.

Hlutfall örorkulífeyrisþega lækkað eða staðið í stað

ÖB segir að ef skoðað er hlutfallið sem fjármálaráðherra vill meina að sé að ríða ríkissjóði að fullu með öllum sem leggja til landsframleiðslunnar, sést að það breytist nær ekkert. „Í raun hefur hlutfall örorkulífeyrisþega af fólki á vinnualdri, lækkað eða staðið í stað undanfarin ár. Það er nú öll hörmungin. Eftir stendur sú tilfinning að tilgangur minnisblaðsins sé fyrst og fremst til að ýja að því að það séu öryrkjarnir sem frekastir eru á fleti. "