Í dag var við Grandagarð í Reykjavík opnað nýtt neyðarskýli fyrir unga heimilislausa karla sem glíma við áfengis- og vímuefnavanda. Neyðarskýlið verður opið alla daga frá klukkan 17 síðdegis til klukkan 10 á morgnana alla daga ársins. Alls er hægt að taka á móti fimmtán einstaklingum hvert sinn og kemur fram í tilkynningu að á hverri vakt verði tveir til þrír starfsmenn.

Neyðarskýlið er þriðja sinnar tegundar á vegum Reykjavíkurborgar en fyrir eru gistiskýlið við Lindargötu og Konukot. Alls verður hægt að taka á móti 45 körlum og 12 konum í neyðarskýlum borgarinnar með tilkomu nýja skýlisins.

,,Við fögnum því að geta bætt þjónustu við unga heimilislausa vímuefnaneytendur,“ sagði Dagur B. Eggertsson borgarstjóri við opnun skýlisins en með tilkomu þess verður borginni kleift að aðgreina hóp yngri og eldri karla sem stríða við heimilisleysi

Borgarstjóri opnaði skýlið formlega í dag.
Fréttablaðið/Ernir

Aukning meðal ungra karlmanna sem stríða við heimilisleysi og vímuefnavanda

Fram kemur í tilkynningu frá borginni að rannsóknir sýni að ungmenni sem stríða við heimilisleysi og glíma við alvarlegan vímuefnavanda séu líklegri til að verða fyrir ofbeldi og því sé mikilvægt að aðgreina hópinn frá eldri neytendum. Þá hafi Rauði krossinn bent á fjölgun í aldurshópnum 18 til 20 ára sem séu heimilislausir og eigi við alvarlegan vímuefnavanda að stríða. Það sé einnig staðreynd að ungum mönnum sem neyta vímuefna um æð hefur fjölgað hlutfallslega í Gistiskýlinu við Lindargötu á undanförnum árum.

Þjónustumiðstöð Vesturbæjar, Miðborgar og Hlíða mun sjá um rekstur neyðarskýlisins en miðstöðin annast umsjón með málaflokki heimilislausra á vegum velferðarsviðs Reykjavíkurborgar. Til að mæta þörfum yngri hópsins verður aldurstakmark á Granda miðað við 30 ára aldur.

Sérfræðingar frá Þjónustumiðstöðinni verða ráðgefandi við stjórnendur neyðarskýlanna og bjóða viðtöl fyrir notendur. Markmið ráðgjafar í nýja neyðarskýlinu er að styðja notendur við að sækja þjónustu og stuðning innan félags- og heilbrigðiskerfisins. Ráðgjafar eru í samstarfi við heilbrigðiskerfið í skimun fyrir smitsjúkdómum og meðferð

Gláma/Kím Arkitektar teiknuðu breytingar á húsinu en Kjölur byggingafélag og Guðmundur Pálsson sáu um framkvæmdir.

Fimmtán geta gist í skýlinu hverja nótt.
Fréttablaðið/Ernir
Engum sem er eldri en 30 ára verður heimilt að gista í skýlinu.
Fréttablaðið/Ernir