Kvika streymir nú upp úr nýju gosopi á eldfjallinu Cumbre Vieja á spænsku eyjunni La Palma.

Um 400 heimili hafa þegar orðið hrauninu að bráð og er búið að loka flugvellinum og aflýsa öllu flugi á eyjunni vegna reyks og ösku sem leggur yfir gígunum. Skógareldar hafa kviknað og ösku rignir yfir borgina Santa Cruz de La Palma.

Göturnar eru svartar og gráar eftir öskufall.
Fréttablaðið/Getty images

Líkt og gerðist í Geldingadölum hefur myndast stór turn upp úr gígnum þar sem hraunflæðið er stöðugt. Turninn á Vumbre Vieja er um 100 metra hár en í gær rofnaði hluti úr honum og mátti þá sjá gríðarlega aukningu í hraunflæði.

Náttúruvásérfræðingar og viðbragðsaðilar á eyjunni hafa sett af stað rýmingaráætlun og er búist við því að spænsk yfirvöld lýsi því yfir að eyjan sé hamfarasvæði.

Þeir íbúar sem þurftu að yfirgefa heimili sína á suðvesturhluta eyjunnar fyrr í vikunni hafa enn ekki getað snúið aftur heim. Sömuleiðis eru strandaðir túristar að reyna að koma sér af eyjunni um borð í bátum og skipum eftir að flugvellinum var lokað.