Áslaug Arna Sigurbjörnsdóttir verður skipaður dómsmálaráðherra á ríkisráðsfundi á Bessastöðum klukkan fjögur í dag. Áslaug hefur á kjörtímabilinu gegnt stöðu formanns utanríkismálanefndar, en fastlega er gert ráð fyrir að Sigríður Á. Andersen taki við formennsku nefndarinnar af Áslaugu.

„Ég er þakklát fyrir traustið sem mér er sýnt,“ segir Áslaug. „Ég er að stíga inn í ákveðna ríkisstjórn sem starfar eftir ákveðnum sáttmála, en fer inn í ráðuneytið full tilhlökkunar og af mikilli auðmýkt gagnvart þeim stóru verkefnum sem framundan eru.“

Skipa þarf nýjan ritara

Samkvæmt reglum flokksins þarf Áslaug að segja sig frá ritarastöðu í forystu flokksins þegar hún tekur við embætti dómsmálaráðherra. Flokksráðsfundur fer fram þann 14. september þar sem arftaki Áslaugar í embætti ritara Sjálfstæðisflokksins verður kosinn. Nefnd hafa verið til sögunnar Elliði Vignisson, bæjarstjóri í Ölfusi, borgarfulltrúarnir Eyþór Arnalds og Hildur Björnsdóttir, Kristján Þór Magnússon, sveitarstjóri Norðurþings, Áslaug Hulda Jónsdóttir, forseti bæjarstjórnar í Garðabæ og Eva Björk Harðardóttir, sveitarstjóri Skaftárhrepps, sem eftirmenn Áslaugar í ritaraembættið.

Þórdís Kolbrún R. Gylfadóttir, varaformaður flokksins, hefur tímabundið setið í stóli dómsmálaráðherra síðan Sigríður Á. Andersen steig til hliðar vegna dóms Mannréttindadómstóls Evrópu um að skipan dómara við Landsrétt bryti gegn ákvæðum Mannréttindasáttmálans. Ákvörðun um hvort taka skuli Landsréttarmálið fyrir í efri deild Mannréttindadómstóls Evrópu verður tekin í Strassborg á mánudag og kynnt á þriðjudag.

Mörg aðkallandi verkefni bíða

Áslaugar Örnu bíða mörg aðkallandi verkefni. Verði dómur Mannréttindadómstólsins tekinn til skoðunar hjá efri deildinni má búast við því að dómstólasýslan ítreki ákall sitt um tímabundna fjölgun dómara við Landsrétt til að takast megi á við tafir á meðferð mála.

Synji Mannréttindadómstóllinn hins vegar beiðni stjórnvalda um endurskoðun dómsins liggur endanleg niðurstaða í Strassborg fyrir og þá þarf ráðherra að finna lausn á málum þeirra fjögurra dómara við réttinn sem dómurinn tekur til.

Réttaróvissa ríkir á fleiri sviðum innan réttarkerfisins og má nefna ákvarðanir endurupptökunefndar og málsmeðferð sakamála á sviði skattaréttar sem gæti þarfnast endurskoðunar vegna áfellisdóma sem fallið hafa í Strassborg á undanförnum misserum.

Þá kemur í hlut Áslaugar að auglýsa eftir og skipa í stöðu dómara við Hæstarétt sem losnar í haust. Ráðherra gæti einnig þurft að hlutast sérstaklega til um málefni ríkislögreglustjóra sem hafa ítrekað verið í fréttum að undanförnu vegna bílamiðstöðvar, óánægju innan sérsveitarinnar og fleiri mála.

Auk framangreindra mála sem hafa verið í sérstökum brennidepli fer dómsmálaráðherra með stóra málaflokka á borð við útlendingamál þar sem málefni hælisleitenda eru fyrirferðamikil.