Blaðamannafélag Íslands og Útgáfufélag Stundarinnar skrifuðu undir kjarasamning seinnipartinn í dag. Samningurinn er samhljóða þeim samningi sem félagið gerði við útgáfufélagið Birtíng og Kjarnann.

„Við sem stýrum Stundinni skorum á önnur fjölmiðlafyrirtæki að freista þess að hagræða með öðrum hætti en launum starfandi blaðamanna,“ sagði Jón Trausti Reynisson, framkvæmdastjóri Stundarinnar í samtali við press.is, vefsíðu Blaðamannafélags Íslands.

„Þannig hefur Stundin til dæmis takmarkað útgáfutíðni og kappkostað að yfirbygging og stjórnunarkostnaður sé í lágmarki. Þó svo að fjölmiðlafyrirtæki eigi erfitt með að borga há laun er ýmislegt hægt að gera til þess að hindra atgervisflótta úr blaðamennsku. Það skiptir miklu máli fyrir allt samfélagið, því besta leiðin til að tryggja gagnsæi og gott upplýsingaflæði til almennings er að viðhalda sterkum kjarna af íslenskum fagblaðamönnum sem geta lifað fjárhagslega sjálfbæru lífi. Auk þess hvetjum við stjórnvöld til þess að tryggja að starfsaðstæður íslenskra fjölmiðla og blaðamanna nálgist aðrar norrænar þjóðir, bæði réttarfarslega og fjárhagslega,“ segir Jón Trausti.

Viðræður við DV, Bændablaðið og Viðskiptablaðið standa yfir en að sögn BÍ ganga þær vel þrátt fyrir að hafa enn ekki skilað niðurstöðu.

Enn á eftir að semja við félög annarra miðla. Stefnt er á verkföll blaðamanna Morgunblaðsins, Fréttablaðsins, RÚV og Sýnar í lok vikunnar með fjögurra tíma vinnustöðvun í fyrramálið klukkan 10.