Ríkisstjórnin er fallin samkvæmt nýrri skoðanakönnun sem Prósent framkvæmdi fyrir Fréttablaðið. Stjórnarflokkarnir mælast með samanlagt 39,9 prósent og fengju 26 menn kjörna á Alþingi samkvæmt könnuninni en 32 þingmenn þarf til að mynda meirihluta.
Stjórnin hefur 38 manna meirihluta á þingi í dag, þar af einn sem gekk úr Miðflokknum og í Sjálfstæðisflokkinn eftir kosningar.
Mestu fylgi tapar Sjálfstæðisflokkurinn sem mælist nú með 17,9 prósenta fylgi en flokkurinn fékk 24,4 prósent í kosningunum síðasta haust. Flokkurinn tapar rúmlega sex prósentustigum og tæplega þriðjungi þingsæta sinna.
Framsóknarflokkurinn hefur einnig tapað miklu fylgi en flokkurinn bætti verulega við sig fylgi í kosningunum og fékk 17,3 prósent. Hann mælist nú með 12,4 prósenta fylgi.
Vinstri græn, fokkur forsætisráðherra, tapar hátt í fjórðungi síns fylgis frá kosningum og mælist með 9,6 prósenta fylgi.
Bæði Píratar og Samfylking bæta við sig um sjö prósentustigum hvor frá kosningum. Samfylking mælist nú með 16,8 prósenta fylgi en fékk 9,9 prósent í kosningunum. Píratar mælast með 16,2 prósent en fengu 8,8 prósent í kosningunum. Viðreisn bætir við sig um einu og hálfu prósentustigi. Fer úr 8,3 prósentum í 9,6 prósent og er með jafn mikið fylgi og Vinstri græn.
Flokkur fólksins og Miðflokkur tapa hins vegar fylgi. Flokkur fólksins missir einn mann samkvæmt könnuninni og Miðflokkurinn fengi 4,1 prósent og dytti út af þingi.
Sósíalistar fengi hins vegar 5,4 prósent og þrjá menn kjörna á þing ef gengið yrði til þingkosninga nú.
Fjöldi þingsæta hvers flokks
Könnunin var framkvæmd frá 13. til 26. apríl. Um netkönnun meðal könnunarhóps Prósents var að ræða. Úrtakið var 3.500 manns og var svarhlutfallið 50,3 prósent.
Fréttin hefur verið uppfærð.
