Málflutningur fór fram í dag máli Samtaka atvinnulífsins (SA) gegn Eflingu stéttarfélagi í Félagsdómi. SA höfðuðu síðasta föstudag mál gegn Eflingu vegna fyrirhugaðs verkfalls hreingerningafólks næstkomandi föstudag. Samkvæmt upplýsingum frá Halldóri Benjamín Þorbergssyni, framkvæmdastjóra SA, niðurstaða dómsins væntanlega á miðvikudaginn.

Bæði er þess krafist í kröfum SA að verkfallið verði dæmt ólögmætt og að Efling verði dæmd til að greiða sekt í ríkissjóð.

Spurður hvort hann hafi tilfinningu fyrir niðurstöðu dómsins segir Halldór í samtali við Fréttablaðið að samtökin myndu aldrei fara þessa leið ef þau væru ekki viss í sínu máli.

Atkvæðagreiðsla ekki samkvæmt lögum

Í tilkynningu SA, frá því síðasta föstudag, kom fram að SA telji að atkvæðagreiðsla Eflingar fyrir verkfallið hafi ekki verið samkvæmt lögum. Þau telja að vinnustöðvun, sem einungis eigi að ná til ákveðins hóps félagsmanns, líkt og á við í verkfalli hreingerningafólks, eigi einungis að bera undir þá sem þátt taka í verkfallinu. Þá er einnig vísað til þess að atkvæðagreiðsla hafi ekki verið póstafgreiðsla samkvæmt laganna skilningi því atkvæðum hafi verið aflað með utankjörfundum fyrir utan einstaka vinnustaði.

Sjá einnig: SA krefst þess að verk­fall verði dæmt ó­lög­mætt

Í dag hófust atkvæðagreiðslur hjá Eflingu um frekari verkfallsaðgerðir hjá bæði starfsfólki hótela og hópbifreiða, þar með talið vagnstjóra Strætó. Atkvæðagreiðslunni lýkur næsta laugardag. Aðeins þeir sem verkföllin taka til eiga atkvæðisrétt.

Sjá einnig: Kjósa um frekari verkföll Strætó og hótela og Meiri­hluti styður verk­föll