Karl­maður var í gær dæmdur í Héraðs­dómi Reykja­ness í níu mánaða fangelsis­vist fyrir að hafa ítrekað brotið kyn­ferðis­lega á frænku sinni um margra ára skeið frá því hún var sex ára gömul.

Brotin stóðu yfir þangað til að stúlkan varð 11 ára en maðurinn er dæmdur fyrir að hafa á­reitt hana kyn­ferðis­lega í nokkur skipti með því að strjúka henni utan­klæða um maga og kyn­færi og í eitt skipti snert kyn­færi hennar innan­klæða.

Mæður mannsins og brota­þola eru systur. Ári áður hafði maðurinn játað að hafa brotið kyn­ferðis­lega á systur sinni þegar hún var á aldinum 9 til 11 ára gömul en Héraðssaksóknari frestaði útgáfu ákæru.

Sagður hafa káfað á systur sinni líka

Síðla árs 2018 vaknaði grunur um að maðurinn hefði framið kyn­ferðis­brot gegn systur sinni. Að sögn stúlkunnar voru brotin framin á heimili þeirra og fólust annars vegar í því að á­kærði kitlaði hana og káfaði í fram­haldi á brjóstum hennar og hins vegar í því að á­kærði færi inn til hennar að nætur­lagi, tæki niður nær­buxur hennar og káfaði á kyn­færum hennar.

Maðurinn gekkst við að hafa í nokkur skipti káfað á kyn­færum systur sinnar en Héraðs­sak­sóknari á­kvað að fresta út­gáfu á­kæru skil­orðs­bundið í þrjú ár þann 20. ágúst 2019.

Ekki nema nokkrum mánuðum síðar barst lög­reglu til­kynningu um að grunur væri að sami maður hefði brotið á frænku sinni.

Í skýrslu frænkunnar fyrir dómi í Barna­húsi í nóvember 2019, sagði hún frænda sinn hafa snert einka­staði hennar „eins og píkuna.“

„Hún kvaðst ekki muna ná­kvæm­lega hve­nær þetta gerðist fyrst, en minnti að hún hafi verið í 1. Eða 2. Bekk í grunn­skóla. Þetta hafi svo hætt árið 2018. Þegar á­kærði braut gegn henni hafi þau verið tvö saman í her­bergi hans, full­klædd upp í rúmi og undir sænga að horfa á bíó­myndir eða þætti, sem hún mátti velja,“ segir í dómnum.

Hún kvaðst ekki muna hversu oft hún fór þangað en það hafi verið „rosa oft.“

Bar fyrir sig að hafa slæmt minni

Karl­maðurinn var yfir­heyrður hjá lög­reglu í desember 2019. Hann hvað sam­skipti sín við frænku sína vera fín og hann hafi hvorki káfað á brjóstum hennar né snert kyn­færi hennar. Þegar borinn var undir á­kærða sá fram­burður frænku sinnar að hann hefði snert píkuna hennar sagði hann: „ég bara ekki í minningunni eða eitt­hvað, ég, ég man ekkert eitt­hvað bein­línis eftir ein­hverju slíku,“ segir í dómnum.

Þá sagðist ekki muna eftir því heldur að hafa kitlað brota­þola og var því við að hann hefði slæmt minni.

Þá var borin undir hann frá­sögn brota­þola um að þetta hafi byrjað þegar hún var 6 til 7 ára og gerst í nærri hvert einasta skipti sem hún kom heim til hans og ekki hætt fyrr en hann hefði flutt af heimilinu. Hann sagðist ekki vita til þess og neitaði allri sök.

Greind í meðallagi og alvarlega þunglyndur

Í dómnum kemur fram að maðurinn hafi verið lagður inn á geð­deild í janúar 2019. Hann undir­gekkst geð­mat og segir dóminum að geð­læknirinn sem fram­kvæmdi matið þætti vafa­samt að manninum yrði refsað. Hann væri með greind í meðal­lagi og al­var­legt þung­lyndi. „Í niður­­­stöðum geð­rann­­sókn­ar seg­ir að á­kærði sé með greini­­legt sam­visku­bit og sekt­ar­­kennd gagn­vart því sem hann gerði syst­ur sinni. Ekk­ert bendi þó til þess að á­kærði sé hald­inn barnagirnd og virðist hann hafa náð fullri stjórn á hvöt­um sín­um gagn­vart stúlk­unni,“ segir í dómnum.

Í niður­stöðum dómsins segir að fram­burður frænku mannsins var talin trú­verðugur og greinar­góður en fram­burður mannsins ó­trú­verðugur.

Hát­semin var því talin refsi­verð og var maðurinn sem fyrr segir dæmdur í níu mánaða fangelsi á­samt því að þurfa greiða brota­þola 800.000 krónur í skaða­bætur.

Lesa má dóminn í heild sinni hér.