Samtals þáðu 19.002 manns bólusetningu á meðan tveggja vikna átaki Heilsugæslu höfuðborgarsvæðisins stóð. Bólusett var 60 ára og eldri og boðið var upp á bólusetningu gegn Covid-19 og inflúensu. Nú þegar átakinu er lokið færast bólusetningar gegn bæði Covid-19 og inflúensu á heilsugæslustöðvarnar.
„Átakið gekk mjög vel og almennt var mikil ánægja meðal þeirra sem komu með þjónustuna,“ segir í tilkynningu frá Heilsugæslu höfuðborgarsvæðisins.
Samtals voru 13.125 skammtar af bólusetningu gegn Covid-19 gefnir, en aðeins var boðið upp á örvunarskammt fyrir þau sem voru með grunnbólusetningu fyrir.
Samhliða því var boðið upp á bólusetningu við inflúensu og gat fólk ráðið hvort það fékk bólusetningu við öðrum eða báðum sjúkdómunum. Alls voru gefnir 15.259 skammtar af bóluefni við inflúensu.
Eftir átakið hafa áttatíu prósent landsmanna yfir 50 ára aldri fengið að minnsta kosti þrjá skammta af bóluefni og vel rúmur helmingur fólks á aldrinum 16 til 50 ára, þetta kemur fram tilkynningunni.
Þá segir einnig að um helmingur landsmanna 70 ára og eldri hafi nú fengið fjóra skammta og þriðjungur fólks á aldrinum 60 til 69 ára.
„Nú þegar bólusetningarátakinu í Laugardalshöll er lokið færast bólusetningar við bæði Covid-19 og inflúensu inn á heilsugæslustöðvarnar. Fólk undir 60 ára aldri sem er með undirliggjandi sjúkdóma er hvatt til að hafa samband við sína heilsugæslustöð og kynna sér hvenær hægt er að koma í bólusetningu,“ segir í tilkynningunni.
