Neytendastofa hefur lagt stjórnvaldssektir á fjögur apótek eftir að hafa skoðað ástand verðmerkinga í apótekum á höfuðborgarsvæðinu.

Í kjölfar athugunar sektaði Neytendastofa Rimu Apótek, Farmasíu, Íslandsapótek og Lyfju Smáratorgi um 50 þúsund krónur hvert.

Skoðunin náði til 49 apóteka á höfuðborgarsvæðinu og voru í fyrstu heimsókn gerðar athugasemdir við verðmerkingar í 44 þeirra. Í skoðununum var sérstaklega kannað hvort vörur væru verðmerktar, hvort verðmerking væri rétt og hvort verðmerkingar fyrir aftan afgreiðsluborð væru nægilega sýnilegar neytendum.

Beindi Neytendastofa þeim fyrirmælum var til allra apótekanna að bæta verðmerkingar að viðlögðum sektum. Skoðuninni var síðan fylgt eftir með nýrri skoðun og hafði meirihluti apótekanna bætt úr verðmerkingum, er fram kemur í tilkynningu.

Í kjölfar seinni skoðunarinnar taldi Neytendastofa tilefni til að sekta áðurnefnd apótek. Voru þau talin hafa vanrækt fyrirmæli stofnunarinnar um bættar verðmerkingar.