Gunnar Sigurðarson, tengiliður Samtaka iðnaðarins hjá Landssambandi bakarameistara á Íslandi, segist kannast við sölu á Sörum á netinu, en bendir á að þetta sé samkvæmt lögum stranglega bannað, enda algjörlega óheimilt að reka handiðnað í atvinnuskyni nema hafa til þess tilskilin réttindi og leyfi.

„Það er algjörlega ljóst að í öllum þessum tilvikum er verið að þverbrjóta allt sem snýr að lögum um hollustuhætti og mengunarvarnir, en þau eiga að tryggja neytendavernd og öryggi matvæla enda þessir aðilar ekki með tilskilin starfsleyfi, eins og gildir um alla sem framleiða og selja matvæli hér landi,“ segir hann.

Þá bendir Gunnar á að í þessum tilvikum er um að ræða atvinnurekstur og af atvinnurekstri ber auðvitað að greiða skatta og gjöld. „Það er því algjörlega skýrt að þarna er verið að fara á skjön við þær leikreglur sem við höfum sett okkur sem samfélag.

Þrátt fyrir að það megi stórefla eftirlit með slíkum brotum, þá veit ég til þess að skattyfirvöld líta þetta grafalvarlegum augum og er ekki hægt að óska neinum að fá bréf eða sektir frá þeim í skóinn,“ segir hann. Sala á sörum hefur aukist á netinu en á mörgum heimilum þykja sörur ómissandi um jólin og leita sífellt fleiri í möguleikann að kaupa þær á netinu í stað þess að baka sjálf. Þá eru tíðar umræður á Facebook-hópnum Matartips! sem telur um 42 þúsund Íslendinga, um hvar hægt sé að fá bestu sörurnar.