Óvissustig Almannavarna hefur verið virkjað vegna svokallaðs Log4j veikleika í samráði við netöryggissveit og Fjarskiptastofu.

Þetta kemur fram í tilkynningu frá Almannavörnum.

Þar segir að veikleikinn sé ekki séríslenskt fyrirbrigði heldur vandamál um allan heim. Þá beinist hann fyrst og fremst að rekstri net- og tölvukerfa.

„Þannig þarf almenningur ekki að óttast hann sérstaklega þegar kemur að heimilistölvunni eða farsímum. Það er þó alltaf góð vinnuregla að uppfæra vírusvarnir og annan hugbúnað um leið og uppfærslur eru kynntar.“

Unnið samkvæmt viðbragðsáætlun

Almannavarnir, netöryggissveitin og Fjarskiptastofa funduðu í hádeginu í dag vegna málsins. Unnið er samkvæmt viðbraðsáætlun almannavarna og netöryggissveitarinnar um verndum ómissandi upplýsingainnviða.

Log4j varð vart síðast liðinn fimmtudag og hafa rekstraraðilar, netöryggissveitin, Fjarskiptastofa og aðrir viðbragðsaðilar unnið sleitulaust að þvi að lágmarka þann skaða sem veikleikinn gæti valdið.

Veitir ríkan aðgang að innri kerfum

„Alvarleiki veikleikans felst fyrst og fremst í því hvað Log4j kóðasafnið er útbreitt og hversu djúpan og ríkan aðgang það getur veitt að innri kerfum,“ segir í tilkynningunni.

„Þeim tilmælum er áfram beint til rekstraraðila net- og tölvukerfa að farið sé yfir öll þau kerfi þar sem veikleikinn gæti hugsanlega verið til staðar. Uppfæra þau án tafar þar sem uppfærslur eru í boði og að setja sig í samband við framleiðendur kerfa/hugbúnaðar til þess að fá upplýsingar um hvenær uppfærslna er að vænta.

Einnig þarf að huga að og fylgjast sérstaklega vel með þeim kerfum í framhaldi af uppfærslu og meta hvort vísbendingar sjáist um að veikleikinn hafi verið nýttur til að koma fyrir spillikóðum meðan kerfin voru veik fyrir,“ segir jafnframt í tilkynningunni.

TIlkynna þarf grun um árás

Fólki er bent á að senda tilkynningu til netöryggissveitarinnar ef grunur leikur á að árás hafi verið gerð á kerfi.

„Tekið er við tilkynningum á öllum miðlum en mælt er með tölvupósti cert@cert.is, eða tilkynningagátt: https://oryggisbrestur.island.is/. Sjá nánar um form tilkynninga og innihald á vef CERT-IS.“