Nemendur mótmæla við MH: „Það verður ekki þaggað niður í okkur“

Í dag gengu hundruð nemenda við Menntaskólann í Hamrahlíð út úr tíma í mótmælaskyni. Mikil umræða hefur verið síðustu daga vegna kynferðisbrota nemenda í framhaldsskólum og viðbragða skólanna, eða skort þar á.

Mikill fjöldi hefur gengið út í öðrum skólum og er stór hópur ungmenna samankominn við MH til að mótmæla. Hér að neðan má sjá myndir og myndbönd sem tekin voru við skólann.

Í vikunni hefur verið greint frá málum í MH og Fjölbrautaskólanum í Breiðholti þar sem nemendur sem voru beittir ofbeldi af öðrum nemanda í skólanum kvörtuðu yfir því að hafa þurft að mæta geranda sínum í skólanum og kölluðu eftir meiri viðbrögðum frá yfirvöldum.

MH hefur brugðist við málinu og beðið nemendur afsökunar. Mennta- og barnamálaráðherra hefur boðað skóla­stjórn­endur á fund um við­brögð við kyn­ferðis­of­beldi í fram­halds­skólum en Samband íslenskra framhaldsskólanema segir Ásmund fallinn á tíma.

„Stjórn SÍF harmar það mjög að aðgerðaleysi stjórnvalda var lítið sem ekkert frá því að atvik kemur upp í Fjölbrautaskólanum á Suðurlandi að núverandi atvikum í Menntaskólanum við Hamrahlíð. Í kjölfarið hefur SÍF tekið þá ákvörðun eftir ákall skólastjórnenda og framhaldsskólanemenda að setja af stað aðgerðarhóp sem SÍF leiðir,“ segir í yfirlýsingu frá samtökunum sem þau sendu út í gær.

Nemendur skipulögðu mótmæli í MH en í viðburðinum má sjá að nemendur í öðrum skólum eru líka hvattir til þess að ganga út og koma að MH eða mótmæla fyrir utan sinn skóla.

Talskona Stígamóta sagði í vikunni að hún hefði á tilfinningunni að #metoo bylting framhaldsskólanema væri við það að hefjast.