Skipulags- og samgönguráð samþykkti einróma á fundi sínum í dag að fela nafnanefnd að gera tillögu að götu eða torgi í Reykjavík sem kennd væru við Úkraínu eða Kænugarð.

Tillagan var lögð fram af fulltrúum Sjálfstæðisflokksins og var þar lagt til að fundinn yrði viðeigandi staður eða að nafni Garðastrætis yrði breytt í Kænugarðsstræti.

„Tengsl Íslands og Kænugarðs ná yfir þúsund ár eins og lesa má um í fornum ritum. Enn þann dag í dag eru talsverð viðskipti og menningarleg tengsl milli Íslands og Úkraínu. Í dag er hart sótt að Úkraínu og höfuðborg hennar. Það er því við hæfi að minnast Kænugarðs að fornu og nýju með því að nefna götu í Reykjavík Kænugarðsstræti,“ segir í tillögunni en ráðið sameinaðist um að finna viðeigandi stað í stað þess að breyta nafni Garðastrætis.