Tónlistarkonan Natalie G. Gunnarsdóttir er ein þeirra sem tók til máls á mótmælum við Austurvöll í dag vegna klaustursmálsins svokallaða. 

Hún segir í samtali við Fréttablaðið í kvöld að skipuleggjendur mótmælanna hafi beðið hana að ávarpa samkomuna því þau hafi viljað að ræðumenn endurspegluðu bæði samfélagið og þá hópa sem voru níddir í samtölum þingmannanna sex í klaustursupptökunum. Natalie er dökk samkynhneigð kona og þekkir því slíka fordóma af eigin reynslu.

Hefur ávallt haft sterka samkennd

Natalie sagði í ræðu sinni að hún stæði frammi fyrir samkomunni með bæði óbragð í munni og sorg í hjarta.

„Sorg yfir því að við ættum að vera að fagna því að það eru hundrað ár frá því að við fengum fullveldi. Þess í stað stöndum við á Austurvelli og mótmælum. Í dag á sjálfan fullveldisdaginn stöndum við frammi fyrir því að spyrja okkur hvernig samfélagi viljum við búa í og fyrir hvað stöndum við sem þjóð?“

Hún sagði síðan frá því að í uppvexti hennar hafi henni snemma verið innprentuð þau gildi að koma fram við aðra eins og hún vildi að aðrir kæmu fram við hana og að bera virðingu fyrir náunganum sem hafi styrkt samkennd hennar með öðrum.

„Ég finn til þegar aðrir þjást og ég virkilega fann til þegar ég las ummæli þingmannanna sex. Ég fann til við að lesa og heyra hvernig þeir kepptust við að gera lítið úr konum. Ég fann til við að lesa um hvernig þeir veittust að fötluðu fólki og samkynhneigðum. Ég fann til. Það sem gerði útslagið var að þegar innt var eftir svörum birtist fullkomið virðingarleysi og hroki. Siðleysið er slíkt. Þetta eru ekki fyrirmyndir sem hvorki við né börnin okkar viljum,“ sagði Natalie í ávarpi sínu.

Menn með forgjöf sem ausa úr sér mannhatri

Hún velti því síðan fyrir sér hvernig stæði á því, þegar okkur öllum er kennt á öllum skólastigum að fara eftir ákveðnum gildum og siðareglum, hvernig standi á því að „fólkið í æðstu valdastöðum geti ekki staldrað við og spurt sig þessara sömu spurninga?“

Hún sagði það „ótrúlega sorglegt að menn með forgjöf í lífinu geti leyft sér að setja sig á stall og ausa úr sér mannhatri með slíkri áfergju að það er leitun á öðru eins. Fólkið sem á að standa vörð um hagsmuni okkar allra. Fólkið sem setur upp brosgrímur þegar á þarf að halda en sýnir svo sitt rétta andlit þegar það heldur að enginn sjái til. Ætlum við endalaust að láta bjóða okkur virðingarleysi og yfirgang eða ætlum við að standa vörð?“

Stöndum á tímamótum sem þjóð

Natalie sagði að við aldarafmæli fullveldis stöndum við sem þjóð á tímamótum og að við þurfum að marka okkur það hvert við stefnum sem samfélag og hvernig umhverfi við viljum skapa börnum.

„Ég vil trúa því að öll viljum við jafnrétti og búa í heilbrigðu samfélagi. Í samfélagi þar sem við eigum ekki á hættu að kjörnir þingmenn verði uppvísir að spillingu, fordómum, ofbeldi og níð. Ég vil trúa því að við séum komin lengra. Hegðunin er svo andfélagsleg og mannfyrirlitningin það mikil að af henni er yfirþyrmandi óþefur. Óþefur sem hverfur ekki fyrr en honum verður svælt út úr Alþingishúsinu.“

Að lokum krafðist hún, líkt og fjölmargir aðrir sem tóku til máls á mótmælunum, að þingmennirnir sex segi af sér tafarlaust.

Ræðu Natalie er hægt að lesa í heild sinni í Facebook-færslu sem hún birti á vegg sínum fyrr í kvöld.