Stuðlagil varð Instagramstjarna Íslendinga ferðasumarið 2020. Nú þegar flestir eru byrjaðir að huga að ferðalögum sumarsins er ekki úr vegi að skoða hvaða staðir geta tekið við af Stuðlagili sem stjarna sumarsins.

1. Stuðlagil

Það vantaði ekki myndir frá Stuðlagili á Instagram á síðasta ári. Sagði landeigandinn að dreifing myndanna minnti helst á einhvers konar faraldur. Landeigandinn fékk engar tekjur af fjöldanum sem kíkti í gilið.

Hvítserkur.
Mynd/Jon Hilmarsson

2. Hvítserkur

Á fjöru er hægt að ná rosalegum Instagram-myndum. Áhrifavaldar með filtera gætu dottið í lukkupott læksins og fengið alþjóðleg like með fallegri mynd af þessum sérstæða kletti og jafnvel horft dreymandi til vinstri í forgrunni.

3. Hljóðaklettar

Húsavík gæti orðið heitasti staður sumarsins. Skammt frá eru Hljóðaklettar, eitt sérstæðasta listaverk náttúrunnar. Þar þarf engan filter því þar á bara að njóta álfa og trölla sem kunna að birtast.

Gljúfrabúi.
Fréttablaðið/Anton Brink

4. Gljúfrabúi

Vissulega kom litli bróðir Seljalandsfoss inn á radar Instagram síðasta sumar en álitsgjafar blaðsins eru sammála um að hann sé líklegur til að slá enn frekar í gegn í sumar. Örstutt ganga og paradís bíður.

Múlagljúfur.

5. Múlagljúfur

Talandi um að horfa dreymandi til vinstri í forgrunni með einhvern ótrúlegasta bakgrunn landsins. Það er nánast gefið að heimurinn muni ýta á like. Ríki Vatnajökuls gæti orðið sjóðheitt í sumar á Instagram enda margt að sjá.

Dimmuborgir.

6. Dimmuborgir

Mývatnssveitin er auðvitað stútfull af ævintýrum en ætli tröllamyndir frá Dimmuborgum séu ekki vænlegar til árangurs, enda eru borgirnar heill heimur út af fyrir sig og auðveldar yfirferðar.

Hellarnir við Hellu.
Mynd/Ragnar Th Sigurdsson

7. Hellarnir við Hellu

Ævintýraheimur útaf fyrir sig í aðeins klukkutíma fjarlægð frá borginni. Ákveðin dulúð svífur yfir þeim enda ekki alveg vitað hvenær þeir voru gerðir. Lýsingin er góð og ætti því að nást góð mynd.

Seljavallalaug.
Fréttablaðið/Getty

8. Seljavallalaug

Ein klassísk sem hefur verið á vitorði Íslendinga lengi. Það er eitthvað við að dýfa sér ofan í þessa friðuðu laug sem var hreinsuð af ösku fyrir um áratug. Flestir símar eru líka vatnsheldir og því lítil hætta á að eyðileggja þá.

Hjörleifshöfði.
Fréttablaðið/Pjetur

9. Hjörleifshöfði

Star Wars var tekið þarna upp og þekkist hellirinn í höfðanum sem Yoda-hellirinn. Það er nánast gefið að sé sett myllumerkið Star Wars með fallegri mynd þá tekur samfélag kvikmyndanna við sér og ýtir á like.