Sjálfstæðisflokkurinn hefur margsinnis ályktað á landsfundum sínum að ríkið skuli ekki reka fjölmiðil.
Í landsfundarályktun flokksins frá því í nóvember segir:
„Allar forsendur ríkisrekins fjölmiðils, sem áttu við fyrir tæplega 100 árum, eru brostnar og tilvist slíks fjölmiðils er tímaskekkja. Hætta á fjárhagslegum stuðningi við rekstur RÚV og kanna hvort rekstrinum sé að öllu leyti eða hluta til betur komið í höndum einkaaðila. Þannig verður sterkari stoðum rennt undir tilvist einkarekinna fjölmiðla í stað beinna ríkisstyrkja.“
Bjarni Benediktsson, fjármálaráðherra og formaður Sjálfstæðisflokksins, sagði við Fréttablaðið 17. desember síðastliðinn að honum þætti „æskilegt að kippa RÚV út af auglýsingamarkaði, vandinn pólitískt er hvað ætti að gera í staðinn.“
Hann bætti því við að í þingflokki Sjálfstæðismanna væri einhugur um að hækka ekki útvarpsgjaldið, en tillaga um slíka hækkun var samþykkt við afgreiðslu fjárlaga.
Lilja Alfreðsdóttir hefur farið með málefni RÚV í ríkisstjórn frá 2017. Hún hefur ítrekað lýst því yfir að hún hyggist taka ríkismiðilinn af auglýsingamarkaði en ekkert hefur hreyfst í þeim efnum í meira en fimm ár.
Þorsteinn Pálsson, fyrrverandi formaður Sjálfstæðisflokksins, er efins um að breytingar verði varðandi RÚV í tíð þessarar ríkisstjórnar, eins og mörg önnur mál bíði það annarrar stjórnar.
„Ég tel að Ríkisútvarpið hafi umtalsverðu hlutverki að gegna á sviði menningar og þjóðmálaumræðu,“ segir Þorsteinn. „Það hefur staðið sig með ágætum í ljósi aðstæðna. En það er í klípu. Hún liggur í því að samkvæmt lögum er Ríkisútvarpinu ætlað að vera hvort tveggja í senn; samfélagsstofnun og markaðsfyrirtæki. Slík skipan er hálfgerður óskapnaður og gengur ekki upp í samkeppnisumhverfi samtímans. Annað hvort á að reka það sem hreina samfélagsstofnun eða hreint markaðsfyrirtæki. Mín skoðun er að það eigi að vera samfélagsstofnun. Því má ná í áföngum á nokkrum árum. Ráðherrar Sjálfstæðisflokks og Framsóknar segjast vera á þessari skoðun en viti bara ekki hvernig þeir eigi að koma hugmyndum sínum í framkvæmd. Á því geta verið tvær skýringar. Önnur er sú að hugur fylgi ekki máli. Hin er að VG sé þrándur í götu. Ég átta mig ekki á því hvor skýringin er sú rétta. En auðvitað má vera að í raun og veru líki þeim best við styrkjakerfi og úthlutanir. Þetta virðist einfaldlega vera eitt af fjölmörgum málum, sem bíða annars konar ríkisstjórnar.“
