Birna Dröfn Jónasdóttir
Laugardagur 28. janúar 2023
07.00 GMT

Sólveig Anna Jónsdóttir stendur, sem formaður Eflingar, í ströngu þessa dagana og gefur ekki þumlung eftir í baráttunni fyrir bættum kjörum síns fólks og þykir víða fyrir vikið vera full föst fyrir og ósveigjanleg.

Þvert á allar slíkar hugmyndir um hana ber vinum hennar og vandamönnum saman um að hún sé fyrst og fremst glaðlynd, hrifnæm, broshýr og sérlega skemmtileg. Þau segja þannig þá mynd sem dregin hafi verið upp af Sólveigu Önnu vera kolranga og víðs fjarri raunverulegum persónuleika hennar.

Sólveig Anna fæddist í Reykjavík þann 29. maí árið 1975. Foreldrar hennar eru Ragnheiður Ásta Pétursdóttir og Jón Múli Árnason. Hún er gift Magnúsi Sveini Helgasyni og saman eiga þau tvö börn. Magnús segir Sollu, eins og hún er alltaf kölluð, ótrúlega skemmtilega og að hann hafi aldrei kynnst manneskju sem sé jafn lítið fyrir sviðsljósið.

„Solla er alveg svakalega skemmtileg og þau eru það í raun öll fjölskyldan og hafa alltaf verið,“ segir Magnús.

„Hún er svo ótrúlega réttsýn og til í að taka slaginn fyrir alla,“ segir hann. „Hún hefur samt aldrei verið fyrir það að trana sér fram eða viljað vera í forgrunni,“ bætir Magnús við.

Sólveig lítil í sveitinni með systrum sínum Oddrúnu og Birnu, bróðir sínum Eyþóri og móður sinni Ragnheiði Ástu.
Mynd/Aðsend

Hrifnæm og glaðlynd

Eyþór Gunnarsson tónlistarmaður er eldri bróðir Sólveigar Önnu. Hann segir hana hafa verið afar hrifnæmt og glaðlynt barn og þannig segist hann sjá hana enn þann dag í dag.

„Hún er fjórtán árum yngri en ég og ég man eftir henni strax þegar hún var lítil sem afar glaðlyndri,“ segir Eyþór.

„Þegar við Ellen vorum farin að búa áttum við kött sem eignaðist kettlinga og ég man alltaf þegar hún kom og hún var bara svona fjögurra ára, hún ljómaði og gargaði upp yfir sig af gleði og þannig man ég eftir henni, hún var sólskinsbarn, alltaf glöð og brosandi,“ segir hann.

„Það var alltaf bjart yfir henni og þannig hefur hún alltaf verið í mínum huga og er enn, þessi mynd sem hefur verið dregin upp af henni sem einhverri harðneskjumanneskju er í svo miklu ósamræmi við það sem allir sem þekkja hana vita, hún er hlý og góð og vill allt fyrir alla gera, þannig er hennar karakter,“ segir Eyþór.

Birna, Sólveig og Eyþór.
Mynd/Aðsend

Hann rifjar upp hversu hrifin systir hans var af sögum og bókum þegar hún var lítil. „Hún elskaði að hlusta á sögur og þegar hún lærði sjálf að lesa las hún mikið sjálf og fékk svona dellur,“ segir Eyþór.

„Á tímabili fékk hún algjöra dellu fyrir Emil í Kattholti og hún breyttist bara í Emil. Hún gekk um með húfu eins og hann og ef maður sagði við hana Solla, þá sagði hún: Ég heiti ekki Solla, ég heiti Emil.“

Gucci og karókí

Sigrún Daníelsdóttir, sálfræðingur og vinkona Sólveigar Önnu, lýsir vinkonu sinni sem afar skemmtilegri og réttsýnni. Hún segir það geta komið mörgum á óvart að hún sé í saumaklúbbi sem heiti Gucci.

„Hann saumar þó hvorki né gengur í Gucci-merkjavöru enda er nafnið borið fram „Cookie“. Þetta er hópur fimmtán kvenna sem hefur fylgst að síðan á unglingsárunum og brallað ýmsar vitleysur sem fæstar þola dagsljósið,“ segir Sigrún.

„Það má segja að Solla hafi alið okkur allar upp í ákveðinni réttlætishugsun, hún var alltaf að pæla og taka afstöðu í alls konar mannréttindamálum, pólitík og prins­ippum sem gátu varla verið fjær okkar unglingaheila. Solla ákvað til dæmis að fermast ekki og fannst fáránlegt af okkur hinum að vera ekkert að velta þessari stóru lífsskoðunarspurningu alvarlega fyrir okkur,“ segir Sigrún.

„Hún hefur alltaf verið svona og það kom engri okkar á óvart þegar hún henti sér í verkalýðsmálin. Hún hugsar dýpra og fer með málin lengra en flest samferðafólk bæði þá og nú,“ bætir hún við.

Solla og Sigrún fara oft saman í göngutúr, hér eru þær á leiðinni í einn slíkan.
Mynd/Aðsend

Sigrún segir að þegar hún kynntist Sollu, þrettán ára í Réttó, hafi hún ekki bara verið óvenjuleg í hugsun heldur einnig í útliti. Hún hafi verið framúrstefnuleg í klæðaburði, mikill prakkari og alla tíð síðan sé Solla einhver skemmtilegasta manneskja sem hún þekki.

„Solla er sniðug og fyndin, segir skemmtilegar sögur, kann að dansa og getur tekið áhrifamiklar dansrútínur ef Prince er settur á fóninn. Hún er líka mjög góð í karókí og kann rokkóperuna Rocky Horror utan að.“

Fallegt og greindarlegt barn

„Ég var tíu ára þegar Solla fæddist og ógurlega ánægð með að eignast litla systur. Solla var fallegt og greindarlegt barn, eins og hún er falleg og greindarleg kona. Hún var með ljóst hár, stór blá augu og alveg einstaklega sætt smábarn. Mamma okkar vann vaktavinnu í útvarpinu svo ég fékk oft að passa Sollu og fannst ég eiga mikið í henni,“ segir Birna Gunnarsdóttir, systir Sólveigar Önnu.

Birna minnist líkt og Eyþór bróðir þeirra á hversu hrifin Sólveig var af sögum og þegar hún vildi aðeins vera kölluð Emil í Kattholti. Hún segir Sólveigu líka hafa verið afar mikið í sundi sem barn. „Jón Múli, pabbi Sollu, fór daglega í Sundhöllina og við oft öll saman, fjölskyldan. Solla fór fyrst í sund í Húsafelli þegar hún var þriggja mánaða og þegar hún stækkaði synti mamma með hana á bakinu í Sundhöllinni,“ segir Birna og bætir við að Sólveig hafi ung verið farin að synda sjálf.

„Þeim sem ekki voru fastagestir í Sundhöllinni brá gjarnan í brún þegar þeir sáu smábarn príla upp á háa brettið og henda sér fram af því út í djúpu laugina, en Solla var ekki í neinum vandræðum og buslaði alsæl eftir stökkið til mömmu eða einhvers úr fjölskyldunni. Hún hefur aldrei verið skræfa og verður aldrei,“ segir Birna.

Birna og Sólveig ásamt móður sinni og Pétri syni Birnu í Kaupmannahöfn.
Mynd/Aðsend

„Hún hefur mjög ríka ábyrgðartilfinningu, er ótrúlega vinnusöm og vandvirk og leggur sig alla fram í því sem hún tekur sér fyrir hendur. Hún skilur hvorki fúsk né fúskara. Og síst af öllu skilur hún þau sem vita að aðrir líða skort og lyfta ekki hendi til að breyta neinu,“ segir Birna um systur sína.

Kvenskörungur og drengur góður

Sólveig Anna er yngsta systir Ragnheiðar Jónsdóttur sem segir systur sína kvenskörung og dreng góðan. „Hún er fylgin sér en nýtir þá fylgni sína í baráttu fyrir mannréttindum og bættum kjörum lægst launaða fólksins í landinu svo það nái að framfleyta sér og sínum,“ segir hún.

Ragnheiður segir Sólveigu vel máli farna og að hún tali tæpitungulaust. „Gerði þó snemma athugasemdir við hin og þessi orð. Alkunna er að börn laðast að hryllingi á vissum aldri: „Hann heitir ekki Drakúla heldur Dragkúla. Dregur blóð úr fólki.“ Og á tíðum ferðum fjölskyldunnar um landið vöktu hjólhýsi sérstaka athygli hennar: „Akkuru heitir þetta hjólhýsi? Þetta er keyrikofi.“,“ segir Ragnheiður.

Í góðum fíling að hlusta á jazz á jómfrúnni á sumardegi.
Mynd/Aðsend

„Skyldum, tengdum og vinum er hún blíð, góð og mæt, sáttasemjari, húmoristi, mannvinur, skynsemin uppmáluð, náttúrudýrkandi, göngugarpur, gleðigjafi, dugnaðarforkur, barna- og dýravinur. Og er þá fátt eitt upp talið,“ segir Ragnheiður.

„Sú mynd sem andstæðingar hennar hafa dregið upp af henni í öllum hugsanlegum fjölmiðlum landsins er okkur með öllu ókunn og óskiljanleg. Ekki eyði ég orðum á þann óhugnað, rangfærslur, lygar, skilningsleysi og grunnhyggni,“ bætir hún við.

Athugasemdir