„Ég bind miklar vonir við MAX-vélarnar – þær eru hagkvæmari og umhverfisvænni kostur og koma til með að efla leiðakerfi Icelandair, viðskiptavinum okkar til hagsbóta,“ segir Bogi Nils Bogason, forstjóri Icelandair.

Á mánudag mun Boeing 737 MAX- vél Icelandair, sem ber nafnið Mývatn, hefja sig á loft í áætlunarflugi til Kaupmannahafnar. Félagið mun taka tvær Boeing 737 MAX vélar í rekstur á ný í mars. Vélunum tveimur var nýlega flogið hingað til lands eftir dvöl í geymslu á Spáni.

Í tilkynningu Icelandair segir að flugmálayfirvöld í Bandaríkjunum, Kanada, Evrópu og víðar hafi nú aflétt kyrrsetningu vélanna eftir yfirgripsmikið endursamþykktarferli. Gerðar hafa verið uppfærslur á vélunum sem tryggja öryggi þeirra, auk þess sem auknar kröfur eru gerðar til þjálfunar flugmanna.

Mörg flugfélög hafa þegar tekið MAX-vélarnar í notkun og hafa flogið hátt í átta þúsund flug í áætlunarflugi síðan kyrrsetningu þeirra var aflétt. Flugfélög vestanhafs tóku vélarnar í notkun í lok síðasta árs en evrópsk flugfélög um miðjan febrúar síðastliðinn.

Á liðnum vikum hefur verið unnið að undirbúningi hjá Icelandair fyrir endurkomu vélanna. Flugvirkjar Iceland­air vinna nú að uppfærslu vélanna í samræmi við kröfur flugmálayfirvalda.

Þá stendur þjálfun flugmanna yfir í þjálfunarsetri félagsins í Hafnarfirði. Þjálfunin er bæði bókleg og í flughermi en Icelandair er eitt fárra flugfélaga í heiminum sem býr svo vel að eiga sérstakan Boeing 737 MAX flughermi.

Icelandair mun sýna þeim farþegum skilning sem kjósa að ferðast með öðrum vélum fyrst um sinn með sveigjanlegum bókunarskilmálum sem verða í boði tímabundið.

„Engin flugvélategund í sögunni hefur farið í gegnum jafn ítarlegt rannsóknar- og umbótaferli og við munum leggja okkur fram við að upplýsa farþega um öryggi vélanna,“ segir Bogi.