Kvenkyns tónlistarmenn báru af á Grammy-verðlaunahátíðinni, sem fór fram í Los Angeles í nótt.

Kántrítónlistarkonan Kacey Musgraves var aðal sigurvegari kvöldsins, hún vann alls fjögur verðlaun fyrir plötuna sína Golden Hour. Hún fékk verðlaun fyrir bestu plötuna, bestu kántríplötuna, besta kántrílagið og besta kántríflutninginn.

Stærsti karlkyns sigurvegari kvöldsins, Childish Gambino, einnig þekktur sem Donald Glover, fékk líka fjögur verðlaun, fyrir besta lagið, bestu smáskífuna, besta myndbandið og besta flutninginn.

Lady Gaga vann þrenn verðlaun fyrir lagið Shallow, sem hún flytur með Bradley Cooper, meðal annars fyrir besta poppflutninginn og besta poppdúettinn.

Dua Lipa vann verðlaun sem besti nýliðinn, Cardi B vann verðlaunin fyrir bestu rappplötuna, Ariana Grande vann verðlaunin fyrir bestu poppplötuna og Emily Lazar varð fyrsta konan til að vinna Grammy-verðlaunin fyrir bestu hljóðblöndunina. Þar að auki voru Dolly Parton og Diana Ross heiðraðar fyrir ævilangt framlag sitt til tónlistar og fjöldi kvenkyns tónlistarmanna fluttu tónlist.

Konurnar voru því í aðalhlutverki á hátíðinni í ár, en í fyrra var hátíðin gagnrýnd fyrir að verðlauna fáar konur.