Skipulagsfulltrúi Mosfellsbæjar gerði athugasemd við útgáfu starfsleyfis fyrir rannsóknaborunum í Þormóðsdal eftir gulli.
Mosfellsbær hefur um árabil barist gegn því að Iceland Resources færi í gullleit á svæðinu.
„Þar sem ekki liggja fyrir neinar heimildir til efnistöku eða verulegs jarðrasks á svæðinu, til framtíðar, lítur Mosfellsbær svo á að öll efnistaka og borun sé óheimil,“ kom fram í athugasemd Mosfellsbæjar.
Gullleitarfyrirtækið lagði fram gögn til Mosfellsbæjar um rannsóknarboranir í Þormóðsdal á síðasta ári og fól bæjarráð skipulagsfulltrúa að senda umsögn til heilbrigðiseftirlitsins.
Í frétt Fréttablaðsins sem birtist á síðasta ári kom fram að skipulagsnefn Mosfellsbæjar gerði alvarlegar athugasemdir við framgöngu og röksemdafærslu Iceland Resources ehf. í samskiptum sínum við sveitarfélagið.
„Sveitarfélagið og bæjarstjórn Mosfellsbæjar hefur áður fjallað um sambærilegar áætlanir Iceland Resources ehf. og þeim bæði mótmælt, síðast 2021, og athugasemdum skilað til forsvarsfólks fyrirtækisins.“
