Ekki hræðast það að stíga fram. Þið sem getið gefið okkur vísbendingar, hafið talað við hann eða hitt hann – eða vitið hvað er hann er niður kominn - ekki vera hrædd. Það er aldrei of seint. Írar eru indælt fólk. Ég bið ykkur, sem móðir.“

Þetta eru skilaboð Hönnu Bjarkar Þrastardóttur til Íra, í sjónvarpsviðtali hjá fjölmiðlinum Virgin Media. Þar ræðir hún um hvarf sonar síns, Jóns Þrastar Jónssonar, sem ekkert hefur spurst til í tæpan mánuð. Hann var í Dublin á Írlandi þegar hann hvarf. Upptökur á myndbandsupptökuvélum 7. febrúar eru það síðasta sem spurst hefur til hans. Ítarleg leit hefur engan árangur borið.

Hanna segir í myndbandinu að hún hafi fengið taugaáfall þegar hún heyrði að hann væri týndur – og hefði varla trúað því. „Það gat ekki verið satt. Þetta var svo ólíkt honum – þetta bara gat ekki verið,“ segir hún um fyrstu viðbrögðin.

Hanna segir að þetta sé það erfiðasta sem hún hafi tekist á við í lífi sínu. „Mér dettur ekkert verra í hug en að vita ekki hvar barnið mitt er,“ segir hún. Jón Þröstur var ekki með síma sinn eða vegabréf þegar hann gekk út af hótelinu sem hann dvaldi á með eiginkonu sinni. Í viðtalinu kemur hins vegar fram að hann hafi verið með greiðslukortin og jafnvel seðlabúnt.

Fram kemur að Jón Þröstur hafi verið að spila póker. Móðir hans segir að hann sláist aldrei eða setji sig í hættulegar aðstæður. Hann sé einfaldlega umhyggjusamur og góður faðir. „Hann hefur gaman að póker. En hann heldur peningunum sem hann notar í pókerinn aðskildum,“ segir hún um tómstundaiðjuna. Hann sé mjög meðvitaður um þau þær hættur sem geta fylgt póker. „Það er ekki vandamálið,“ segir hún.

Hún segist í viðtalinu ekki útiloka að eitthvað slæmt hafi komið fyrir. „Þegar maður hefur enga hugmynd kemur allt til greina. Þannig tökumst við á við þetta. Við verðum að finna hann, það er í forgangi,“ segir hún um nálgun fjölskyldunnar á hvarfi hans. Hún segist ekki ætla frá Írlandi án sonar síns, og biðlar til Íra að færa fjölskyldunni vísbendingar.