Að minnsta kosti 29 eru látnir eftir að jarð­skjálfti af stærð 7,2 reið yfir á Haítí í morgun. Upp­tök skjálftans voru í vestur­hluta landsins, skammt frá bænum Saint-Louis du Sud og fannst hann einnig vel í höfuð­borginni Port-au-Prince.

Ariel Henry, for­sætis­ráð­herra Haítí, stað­festi í dag að skemmdir af völdum skjálftans væru veru­legar. Neyðar­stigi var lýst í landinu eftir skjálftann og mun það vara í einn mánuð hið minnsta, að því er segir í frétt BBC.

„Hér eru mörg hús ónýt, margir látnir og margir á sjúkra­húsi,“ segir Christ­elle Saint Hilaire í sam­tali við AFP-frétta­veituna. Christ­elle er bú­sett í vestur­hluta landsins, ná­lægt upp­tökum skjálftans.

Í frétt BBC er haft eftir Frantz Duval, rit­stjóra dag­blaðsins Le Nou­velliste á Haítí, að tvö hótel væru meðal þeirra bygginga sem hefðu hrunið í bænum Les Ca­yes. Bætti hann við að sjúkra­hús bæjarins hefði ekki undan að að­stoða fólk sem hafði slasast.

Haítí er í raun enn í sárum eftir öflugan skjálfta sem reið yfir landið í janúar 2010. Upp­tök skjálftans, sem var 7,0 að stærð, voru ná­lægt höfuð­borginni Port-au-Prince og lagði skjálftinn borgina í rúst.