Sá bílamarkaður sem stækkað hefur hraðast á undanförnum árum er í Kína, en nú virðist vera nokkuð lát á. Talsverðar líkur eru á því að færri bílar verði keyptir í Kína í ár en í fyrra og yrði það í fyrsta sinni sem slíkt gerist í nokkra áratugi. Vegna þessa hefur myndast þrýstingur á kínversk yfirvöld að lækka 10% innflutningstollinn á erlenda bíla niður í 5%. Fyrir slíku eru fordæmi í Kína og var þessi skattur hærri áður. Þegar hann var lækkaður síðast fylgdi mikil aukning í sölu í kjölfarið. 

Svo til allir bílaframleiðendur heims selja bíla í Kína og hjá flestum þeirra er Kína þeirra stærsti markaður. Það gæti því orðið mikið högg fyrir þá ef markaðurinn í Kína minnkar. Bílasala í Kína minnkaði bæði í júlí og ágúst á þessu ári, en tölur frá síðasta mánuði hafa ekki enn verið birtar. Bílasala í Kína í fyrra var um 24 milljónir og talan fyrir þetta ár verður nærri því, en ef til vill örlítið lægri.