Árlegur alþjóðlegur minningardagur um fórnarlömb umferðarslysa er haldinn í dag.

Í ár verður áhersla lögð á afleiðingar þess að notast ekki við öryggisbelti í umferðinni og verða táknrænar minningarstundir haldnar víðsvegar um landið.

Þetta kemur fram í fréttatilkynningu frá Samgöngustofu.

„Minningarathöfn verður haldin við Björgunarmiðstöðina í Skógarhlíð kl. 14:00. Forseti Íslands og samgöngu- og sveitarstjórnarráðherra verða viðstaddir og flytja ávörp. Við þetta tækifæri munu forseti og ráðherra, ásamt fulltrúum viðbragðsaðila, kveikja á kertum til minningar um fórnarlömb umferðarslysa og verður boðuð einnar mínútu þögn sem landsmenn eru hvattir til að taka þátt í.“

Þá segir að athöfninni verður einnig streymt á minningardagsins, minningardagur.is og á Facebook síðu þeirra vegna faraldursins.

„Sautján minningarviðburðir eru skipulagðir um land allt í samvinnu við Slysavarnafélagið Landsbjörg og verða flestir þeirra í beinu vefstreymi. Fólk er hvatt til að taka þátt með því að fylgjast með í gegnum streymi og kveikja á kertum til minningar um fólk sem látist hefur eða slasast alvarlega í umferðinni.,“ segir í tilkynningunni.

Einkennislag dagsins

Lag KK, When I Think of Angels í flutningi hans og Ellenar Kristjáns var samið til minningar um systur þeirra sem lést í umferðarslysi í Bandaríkjunum árið 1992. Lagið verður flutt samtímis á öllum útvarpsstöðum í beinni útsendingu klukkan 14.

Sjö látnir á árinu

„Tilgangurinn með deginum er að minnast þeirra sem látist hafa í umferðinni, leiða hugann að ábyrgð hvers og eins í umferðinni. Þá er rík hefð fyrir því á minningardeginum að færa starfsstéttum, sem sinna björgun og aðhlynningu þegar umferðarslys verður, þakkir fyrir mikilvægt og óeigingjarnt starf.

Minningardagurinn er alþjóðlegur undir merkjum Sameinuðu þjóðanna sem hafa tileinkað þriðja sunnudag í nóvember þessari minningu. Um það bil 3.600 einstaklingar láta lífið og hundruð þúsunda slasast í umferðinni í heiminum á degi hverjum.

Frá því að fyrsta banaslysið var skráð hér á landi 25. ágúst 1915 hafa 1592 látist í umferðinni á Íslandi, til og með 16. nóvember 2021. Enn fleiri hafa slasast alvarlega, takast á við áföll, sorgir og eftirsjá af þessum völdum.

Það sem af er þessu ári hafa sjö einstaklingar látið lífið í umferðinni hér á landi. Allt árið 2020 létust sjö einstaklingar í umferðinni en sex árið 2019.

258 dagar án banaslyss

Alls liðu 258 dagar án nokkurs banaslyss á árinu og er það lengsti tími frá því að skráningar hófust 1966. Að meðaltali hafa undanfarin tíu ár 12 manns látist í umferðinni á hverju ári. Tíu ár þar á undan þ.e. frá 2001 til og með 2010 létust að meðaltali 20 manns á ári í umferðinni hér á landi.

Segja má að allt samfélagið deili með sér alvarlegum afleiðingum umferðarslysa. Vart er til sá einstaklingur sem þekkir ekki einhvern sem lent hefur í alvarlegu slysi í umferðinni. Það er því til mikils að vinna að koma í veg fyrir slysin og megi þessi dagur efla vitund okkar fyrir því og ábyrgð,“ segir í tilkynningunni.

Mynd/Aðsend