Í áætlunum Volkswagen Group fyrir síðasta ár var gert ráð fyrir 4-5% hagnaði af veltu, en uppgjör VW Group leiddi í ljós 3,8% hagnað af veltu síðasta árs. Hagnaður af veltu árið áður var 4,2% og féll því um 0,4% á milli ára. Helsta vandamál flestra bílamerkja Volkswagen Group á síðasta ári tengdist nýrri WLTP mengunarreglugerð þar sem framleiðendurnir þurftu tímabundið að taka margar bílgerðir sínar úr sölu þar sem þær uppfylltu ekki nýju reglugerðina. Sérstaklega hitti reglugerðin illa fyrir bílamerkin Audi og Bentley. Fyrir vikið varð tap af rekstri Bentley uppá 288 milljón evrur en hagnaður var á rekstri Bentley árið áður uppá 55 milljón evrur.

WLTP olli erfiðleikum

Forsvarsmenn Volkswagen Group segja að nýja WLTP reglugerðin muni áfram á þessu ári hafa neikvæð áhrif á rekstur samstæðunnar, en þó í mun minna mæli en í fyrra. Heildarhagnaður Volkswagen Group í fyrra nam 13,92 milljarðar evra, eða um 1.900 milljarðar króna. Það voru fyrirtækin Audi og Porsche sem áttu sem fyrr vænan skerf í hagnaðarsköpun VW Group, en Audi skilaði 4,7 milljarði evra í hagnað og Porsche 4,1 milljarði og því áttu þessi tvö bílamerki 63% af hagnaði Volkswagen Group. Volkswagen merkið skilaði hinsvegar 3,2 milljörðum evra í hagnað og skapaði því minni hagnað en bæði hin miklu minni bílamerki Audi og Porsche. Sem fyrr er stærðin ekki allt! Sala Volkswagen Group minnkaði í Ameríku álfunum tveimur um 2% í fyrra, ekki síst vegna þess að fyrirtækið dróg sig frá taprekstri á ákveðnum svæðum í Mexíkó og vandamálum í Brasilíu og Argentínu. Salan í Bandaríkjunum jókst hinsvegar um 2%.

Kína 39% af sölu VW Group

Salan í Kína jókst um 0,5% og þar seldi Volkswagen Group 4,5 milljón bíla í fyrra og er landið stærsta markaðssvæði samstæðunnar. Salan í Kína er 39% af allri framleiðslu VW Group. Þar sem samdráttur var almennt í bílasölu í Kína í fyrra jók VW Group við markaðshlutdeild sína í landinu og var hún 18,5% í fyrra. Í áætlunum Volkswagen Group fyrir árið í ár er gert ráð fyrir 5% hagnaði af sölu og hann á svo að hækka í 6,5-7,5% á næsta ári. Ein afleiðing þess að ná fram meiri hagnaði af sölu er fækkun starfsfólks og því má búast við uppsögnum eða samningum um starfslok hjá fyrirtækinu í ár og á næstu árum. Forsvarsmenn Volkswagen Group segir að það rími ágætlega við nýjar áherslur á smíði rafmagnsbíla sem krefjast um 30% færra starfsfólks í samsetningu þar sem þeir eru einfaldari smíði en bílar með brunavélar.