Eigendur danskra minkabúa hafa lögsótt danska ríkið vegna skipunar um að aflífa öll dýrin. Skipunin var gefin út í nóvember árið 2020 vegna stökkbreytts afbrigðis Covid-19 og olli miklu fjaðrafoki. Krefjast bændurnir þess að fá 600 milljónir danskra króna, eða um 12 milljarða íslenskra króna, aukalega í bætur ofan á það sem þingið hefur ákveðið.

Danska þingið hefur þegar ákveðið að bæta bændunum skaðann. Verður bændum boðnar 250 danskar krónur fyrir hvert skinn, eða tæpar 5 þúsund íslenskar krónur. Alls er pakkinn 19 milljarðar danskra króna og 2,5 milljarðar hafa þegar verið greiddir út.

Þetta eru bændurnir ekki sáttir við því að meðalverð skinna á mörkuðum í ár er 323 krónur, og vantar því 73 krónur upp á. Er krafa bændanna byggð á þessum mun.

„Dýrin, sem var lógað í nóvember í fyrra, átti að selja í ár. Þess vegna ættum við að fá greitt samkvæmt núverandi verðlagi,“ sagði Jens Jensen minkabóndi í samtali við sjónvarpsstöðina TV2.

Mette Fredriksen forsætisráðherra tilkynnti þann 4. nóvember í fyrra að allar 15 milljónir minka landsins skyldu aflífaðar samstundis. Sagði hún að hið stökkbreytta afbrigði sem fannst gæti ógnað væntanlegum bóluefnum, en á þeim tíma voru fyrstu bóluefnin að líta dagsins ljós.

Eftir rannsóknir fannst kóróna­veiran í alls 207 minkabúum og hið stökkbreytta afbrigði dró úr næmi mótefnanna. Minkabændur lýstu aðgerðunum sem endalokum minkaræktunar í Danmörku.

Málið hafði miklar pólitískar afleiðingar því að viku eftir ákvörðun ríkisstjórnarinnar kom í ljós að ekki hafði reynst lagalegur grundvöllur fyrir henni. Þann 19. nóvember axlaði Mogens Jensen landbúnaðarráðherra ábyrgð og sagði af sér embætti.

„Ég er búinn að biðjast afsökunar og geri það aftur, sérstaklega bið ég minkaræktendur afsökunar sem eru í erfiðum aðstæðum,“ sagði Jensen.

Eftir að minkarnir voru aflífaðir voru þeir urðaðir á vöktuðu svæði á vesturhluta Jótlands sem áður var æfingasvæði fyrir danska herinn. Voru þeir grafnir einn metra ofan í jörðina en það dugði ekki til því þegar hræin rotnuðu og blésu út komu þau upp úr fjöldagröfum sínum og lágu eins og hráviði úti um allt.

„Vandamálið er að jarðvegurinn hér í Vestur-Jótlandi er of léttur,“ sagði Thomas Kristensen, upplýsingafulltrúi ríkislögreglunnar, við ríkisútvarpið DR þann 24. nóvember. Var þó talin lítil smithætta af fjöldagröfunum.