Í dag er útlit fyrir norðlæga átt, 3-10 m/s. Það verða dálítil él norðanlands og stöku él við suðausturströndina, en bjart með köflum á suðvestanverðu landinu. Frost verður 3 til 13 stig í dag og það herðir á frosti í nótt og þá gæti það farið niður í 20 stig. Spár fyrir illviðri föstudags hafa lítið breyst.

Síðdegis á morgun stefnir í vaxandi austlæga átt á Suður- og Vesturlandi og það þykknar upp með éljum við ströndina og dregur úr frosti.

Mesta frost í nótt mældist 16,4 stig á Sandskeiði, 15,2 stig á Húsafelli, 14,1 stig á Grímsstöðum á Fjöllum og 13,7 stig í Víðidal við reiðvöll Hestamannafélagsins Fáks. Í nótt og fyrramálið gæti 20 stiga frost eða meira mælst á einhverjum stöðum, líklegast er að það gerist inn til landsins þar sem lægðir eru í landslagi.

Illviðrisspár lítið breyttar

Seint á morgun fer að hvessa úr austri og spár fyrir illviðri föstudagsins eru lítið breyttar og verða líklegri til að rætast eftir því sem nær dregur. Nú á miðvikudagsmorgni er lægðin sem á að valda óveðrinu stödd suðvestur af Nýfundnalandi og er skýjakerfi hennar greinilegt á tunglmyndum. Óveðurslægðin fer til austurs út á Atlantshaf í dag og dýpkar ört, en á morgun tekur hún stefnu til norðurs og nálgast okkur. Búist er við að óveðrið hafi náð hámarki á Íslandi á föstudagsmorgun. Viðvaranir vegna veðursins verða uppfærðar í dag eftir því sem nýjar og nákvæmari spár berast.

Veðurhorfur á landinu næstu daga

Á fimmtudag:

Norðlæg eða breytileg átt 3-10 m/s og víða léttskýjað, en stöku él við norðurströndina. Frost 6 til 20 stig, kaldast í innsveitum. Vaxandi suðaustanátt suðvestantil á landinu síðdegis, þykknar upp með éljum við ströndina og dregur úr frosti.

Á föstudag:

Austan stormur, rok eða ofsaveður, hvassast sunnantil á landinu framan af degi. Víða slydda eða snjókoma, úrkomumest sunnan- og austanlands. Hlýnandi veður, rigning á láglendi um landið sunnanvert og við austurströndina undir kvöld með hita 1 til 5 stig, en vægt frost fyrir norðan. Talsvert hægari vindur víðast hvar á landinu um kvöldið.

Á laugardag:

Gengur í allhvassa eða hvassa austanátt með rigningu eða slyddu, einkum sunnan- og austantil á landinu. Hiti 1 til 6 stig síðdegis.

Á sunnudag:

Norðaustlæg átt með rigningu eða slyddu norðan- og austanlands og snjókomu um kvöldið. Úrkomulítið sunnan heiða. Heldur kólnandi.

Á mánudag:

Norðanátt og snjókoma eða él á Norður- og Austurlandi, en bjartviðri um landið sunnan- og vestanvert. Víða vægt frost.

Á þriðjudag:

Suðvestlæg átt með dálitlum éljum, en léttskýjað fyrir norðan og austan. Hiti breytist lítið.

Færð og ástand vega

Vetrarfærð er í öllum landshlutum, á Norðaustur- og Austurlandi er víða éljagangur og skafrenningur.