Míkhaíl Sergejevítsj Gorbatsjov, síðasti leiðtogi Sovétríkjanna, er látinn 91 árs að aldri. Samkvæmt rússneskum fjölmiðlum lést hann á spítala í Rússlandi en Reuters greinir frá. Í frétt Reuters er honum hampað fyrir að hafa komið að endalokum Kalda stríðsins án þess að til blóðsúthellinga hafi komið.
Gorbatsjov tók við sem aðalritari Kommúnistaflokks Sovétríkjanna 11. mars 1985 þegar Konastantín Tsjernenko lést.
Gorbatsjov reyndi að breyta ásýnd kommúnistaflokksins með glasnost (opnun) og endurskipulagningu en talið er að það hafi orðið kommúnistaflokknum að falli.
Gorbatsjov kom til fundar við Ronald Reagan á Íslandi árið 1986. Meginmarkmið fundarins var að ná samkomulagi um afvopnun kjarnorkuvopna þessara tveggja stórvelda sem háð höfðu kalt stríð um áratuga skeið og losa um spennu sem myndast hafði í samskiptum ríkjanna. Þrátt fyrir að markmið leiðtogafundarins hafi ekki náðst var hann þó þýðingarmikill liður í þeirri afvopnunarvegferð sem leiðtogarnir voru á.
Fundurinn vakti gríðarlega athygli hér á landi sem og í heiminum öllum enda markaði hann tímamót í torveldum samskiptum Bandaríkjanna og Sovétríkjanna. Áhugasamir Íslendingar tóku virkan þátt í öllu því umstangi sem fundinum fylgdi og segja má að gripið hafi um sig eins konar leiðtogafundar-æði hér á landi.
Mikill viðbúnaður var vegna komu leiðtoganna. Stór hópur fylgdarmanna fylgdi leiðtogunum tveimur og mikill fjöldi blaðamanna fylgdu þessum merkisatburði eftir og augu heimsins beindust að litla húsinu sem kallast Höfði. Ráðist var í umfangsmiklar götulokanir í Reykjavík og vopnaðir verðir frá Íslandi, Bandaríkjunum og Sovétríkjunum voru við öllu reiðubúnir.
Eftir rúmlega tveggja klukkustunda langan fund stöldruðu Reagan og Gorbatsjov stuttlega við fyrir framan Höfða þar sem þeir tjáðu fjölmiðlum að fundurinn hefði misheppnast. Þeir félagar linuðust hins vegar eftir því sem árin liðu og viðurkenndu að fundurinn hefði sannarlega lagt grunninn að því að binda enda á kalda stríðið og hefja kjarnorkuafvopnun stórveldanna tveggja.
Eftir að Berlínarmúrinn féll árið 1989 jukust vandamál Gorbatsjov. Sóvétríkin voru að barmi borgarastyrjaldar og reyndi Gorbatsjov að koma í veg fyrir sundrung. Árið 1991 var reynt að steypa honum af stóli og var hann settu í stofufangelsi við Svartahaf. Í júní 1991 var kosinn nýr forseti Rússlands og þann 25. desember var sóvéski fáninn tekinn niður af Kreml í síðasta sinn og sagði Gorbatsjov af sér sem forseti.
Gorbatsjov hlaut friðarverðlaun Nóbels árið 1990.
