Borið hefur á því að undanförnu að farið hafi verið inn í bílaleigubíla í umdæmi lögreglunnar á Suðurnesjum og greipar látnar sópa.

Dýrum tækjabúnaði hefur verið stolið úr bílunum, svo sem myndavélum í framrúðu, vélartölvum, útvörpum og miðstöðvum, er segir í tilkynningu frá lögreglu.

Einnig séu dæmi um að ljósabúnaður hafi verið fjarlægður af bifreiðum og var nú síðast um helgina öllum fjórum hjólbörðunum stolið undan bílaleigubíl.

Í ljósi þessa beinir lögregla þeim tilmælum til forráðamanna bílaleiga að ganga vel og tryggilega frá bifreiðum og geyma þær ekki á fáförnum stöðum.