„Ef þú selur bíl þá getur þú ekki reiknað með því að þú getir haldið áfram að nota hann,“ segir Páll Ágúst Ólafsson, lögmaður Michele Ballarin, sem keypti eignir úr þrotabúi WOW air og vill að þrotabúið hætti að nota nafnið WOW.

Ballarin keypti margvíslegar eignir af þrotabúi WOW air í september 2019 fyrir 50 milljónir króna, þar með talið vörumerkið WOW air. Páll segir að þess hafi verið krafist frá upphafi að þrotabúið hætti að nota WOW nafnið.

„Ég hef margoft ítrekað þetta en þeir ætla ekki að breyta nafninu,“ segir Páll, um viðbrögð skiptastjóranna sem stýra þrotabúinu.

„Það er náttúrlega óskiljanlegt að þeir skuli vera að nota vöru sem er búið að selja,“ bætir Páll við. „Sérstaklega í ljósi þess að það eru uppi áætlanir um að endurvekja þetta nafn á einhvers konar jákvæðum grunni og það er klárlega ekki til hagsbóta fyrir nafnið að það skuli þrotabú heita það sama.“

Nafni félagsins Háutindar ehf., sem sótti um flugrekstrarleyfi á dögunum með vísan í flugrekstrarhandbækur hins horfna WOW air, var í gær breytt formlega í Flugfélagið WOW air ehf.

Að sögn Páls er var nafn og vörumerki WOW keypt til einkaréttarlegrar ráðstöfunar fyrir kaupandann. Hann segist ekki hafa hugsað svo langt hvað skuli til bragðs taka af skiptastjórar þrotabúsins neita að hætta notkun WOW nafnsins. „Ég trúi ekki öðru en að þeir muni breyta nafninu. Þetta er hvorki hjálplegt né gagnlegt og kann að vera skaðlegt,“ ítrekar lögmaðurinn.

Fyrir rúmum tveimur vikum sagði Fréttablaðið frá því að Páll óskaði eftir því að ellefu menn, sem tengjast WOW og flugfélaginu Play, yrðu boðaðir til svokallaðra vitnaleiðslna hjá Héraðsdómi Reykjaness.

Páll Ágúst Ólafsson, lögmaður Michele Ballarin
Fréttablaðið/Mynd úr safni

„Þetta er heimilt að því gefnu að þú sýnir fram á að þú eigir lögvarða hagsmuni sem kunni að fara forgörðum verði ekki gripið til aðgerða með skjótum hætti. Það eina sem getur komið í veg fyrir þetta er það annars vegar að dómari telji að ekki sé um lögvarða hagsmuni að ræða sem þoli ekki bið, eða að dómari telji að um hugsanlega refsiverða háttsemi sé að ræða,“ útskýrir Páll.

Með vitnaleiðslunum vill Páll láta varpa ljósi á atburði sem tengjast þroti WOW air og stofnun Play.

„Það sem ég tel að hafi gerst er að einstaklingar innan WOW air, áður eða eftir að það fór í þrot, hafi tekið sér til handargagns flugrekstrarhandbækur ásamt viðeigandi fylgiskjölum – sem eru gríðarlega umfangsmikil – og afritað þau og að þessum skjölum hafi síðan verið eytt af drifum félagsins eða þrotabúsins,“ segir Páll.

Fram hefur komið að flugrekstrarhandbækurnar hafi ekki verið afhentar úr þrotabúinu enda virðist þær ekki að finna í búinu. Páll telur gögnin að finna í fórum Play-manna sem hafi hagnýtt sér handbækurnar sem Ballarin hafi greitt fyrir en fái ekki í hendur. Forstjóri Play hefur lýst þessu sem fjarstæðukenndu.

„Þeir hafa hafnað því en það er í sjálfu sér ekki flókið að komast að hinu sanna. Það væri hægt að taka flugrekstrarhandbækur ásamt fylgigögnum gamla WOW air – ef þær væri einhvers staðar að finna – og flugrekstrarbækur og fylgiskjöl Play og bera saman,“ segir Páll

„Við værum ekki á þessari vegferð ef við teldum ekki að þessi atburðarás hefði átt sér stað nokkurn veginn með þeim hætti sem ég hef lýst. Ég get ekki sagt hvernig ég veit það – en ég veit það.“