Fimm byggingar Háskóla Íslands hafa orðið fyrir tjóni eftir að kaldavatnslögn gaf sig í nótt með þeim afleiðingum að rúm tvö þúsund tonn af vatni flæddi inn í kjallara Háskóla Íslands. Mesta tjónið er í Gimli og í Háskólatorgi.

Þungt hljóð er í Jóni Atla Benediktssyni rektor eftir vatnslekann.

„Við erum að fara yfir þetta en við sjáum að það er tjón í fimm byggingum. Það er gríðarlegt vatnsjón í Gimli og byggingin er rafmagnslaus. Loftræstikerfið nánast fylltist af vatni og rafmagnstaflan er líklega ónýt,“ segir Jón Atli í samtali við Fréttablaðið.

Fréttablaðið/Valli
Fréttablaðið/Valli

Slökkvilið hefur verið að störfum frá því í nótt að dæla út vatni. Mikið vatn flæddi á fyrstu hæð í Háskólatorgi þar sem eru stórir fyrirlestrarsalir, aðstaða til rannsókna, kennslustofur, tölvuver og lesrými. Gangurinn milli Háskólatorgs og Veröld, hús Vigdísar, fór illa út og er verið að dæla þar út vatni.

Engar skemmdir urðu hins vegar hjá Árna­stofnun þar sem hand­rita­safn Árna Magnús­sonar er geymt. Hand­rita­safnið er á varð­veislu­skrá UNESCO og er eitt mesta safn ís­lenskra menningar­verð­mæta. Þar eru geymd 1666 hand­rit en það síðasta var af­hent ís­lensku þjóðinni frá Dan­mörku árið 1997. Þó eru enn hand­rit úr safni Árna geymd í Dan­mörku. Auk þess má finna þar 1345 ís­lensk forn­bréf í frum­riti og tæp­lega sex þúsund forn­bréfa­upp­skriftir.

„Verðmætu bækurnar og skjölin í Árnagarði virðast ekki hafa farið illa út,“ segir rektor. Verið er að kanna geymslurnar í aðalbyggingu HÍ en þar virðist ekki hafa verið mikið tjón þó að vatn hafi lekið þar inn. Einnig er verið að kanna fyrstu hæðina á Lögbergi.

Sömuleiðis sluppu Stúdentagarðar algjörlega við vatnslekann. Skrifstofa Félagsstofnun stúdenta staðfestir í samtali við Fréttablaðið að ekkert vatn hafi komist inn í Gamla garð.

Fréttablaðið/Valli

„Þetta er alveg hræðilegt en við vonum hið besta. Þetta hefur áhrif á kennsluna og við leitum lausna. Það var brugðist hratt við,“ segir Jón Atli.

Kristinn Jóhannesson, sviðsstjóri framkvæmda- og tæknisviðs Háskóla Íslands, segir í samtali við RÚV að tjónið hlaupi sennilega á hundruðum milljóna.