Menningarnótt í Reykjavík hefur verið aflýst vegna heimsfaraldursins í ár. Ákvörðunin var tekin á fundi neyðarstjórnar Reykjavíkurborgar í morgun en það þótti vera það ábyrgasta í stöðunni.

„Þetta er auðvitað leitt en við verðum öll að sýna ábyrgð og lágmarka hættu á smitum í samfélaginu,“ sagði Dagur B. Eggertsson borgarstjóri, um málið. Mikil samstaða hafi verið um ákvörðunina og kvað borgarstjóri neyðarstjórnina hafa verið einhuga í ákvörðun sinni.

Fyrr í sumar var greint frá því að til stæði að dreifa hátíðardagskránni yfir tíu daga tímabil en í ljósi hertari samkomureglna þótti rétt að aflýsa henni. „Við höfðum verið að skoða ólíkar útfærslur á hátíðinni en í ljósi þróunar síðustu daga og vikna töldum við réttast að aflýsa Menningarnótt í ár,“ bætti Dagur við.

Árleg hátíð í aldarfjórðung

Þetta er í fyrsta sinn frá árinu 1996 sem Menningarnótt fer ekki fram en hún er haldin í miðborginni fyrsta laugardag eftir afmæli Reykjavíkurborgar, þann 18. ágúst. Undanfarin ár hafa allt að hundrað þúsund gestir lagt leið sína í miðbæin til að sækja þá fjöbreyttu viðburði sem boðið er upp á.

Borgarstjóri og skipuleggjendur hátíðarinnar vonast til þess að Menningarnótt verði enn kraftmeiri á næsta ári og hlakka til að halda upp á afmælishátíðina á ný.

Þúsundir manna koma saman ár hvert til að fagna Menningarnótt.
Fréttablaðið/Ernir