Ný könnun fyrir Fréttablaðið sýnir að meirihluti vill að mun meira fé sé varið til reksturs Landspítalans en nú. Stuðningsmenn Sjálfstæðisflokksins eru líklegastir til að vilja að fjárveitingar til spítalans haldist óbreyttar.

Meirihluti landsmanna vill að miklu meira fé verði veitt til reksturs Landspítalans en nú er. Samkvæmt niðurstöðum könnunar sem Prósent gerði fyrir Fréttablaðið vilja 57 prósent þeirra sem taka afstöðu að veitt verði miklu meira fé til reksturs Landspítala, 28 prósent vilja að aðeins meira fé verði veitt til rekstursins og 13 prósent vilja að það haldist óbreytt. Tvö prósent vilja veita aðeins minna fé að miklu minna fé til rekstursins.

Konur eru almennt hlynntari auknum fjárveitingum en karlar, 64 prósent kvenna vilja veita miklu meira fé í reksturinn á móti 50 prósentum karla. Lítill sem enginn munur er á milli höfuðborgarsvæðisins og landsbyggðarinnar.

Fólk með 800 þúsund krónur eða meira í mánaðarlaun er líklegra til að vilja halda fjárveitingum til Landspítalans óbreyttum en fólk með lægri tekjur, um 25 prósent þeirra vilja að fjárveitingar haldist óbreyttar eða lækki. Lítill munur er á afstöðu þegar litið er til menntunar.

Töluverður munur er á afstöðu fólks eftir stjórnmálaskoðunum, meirihluti stuðningsmanna allra flokka vill þó að meira fé verði veitt til rekstursins. Stuðningsmenn Sjálfstæðisflokksins skera sig úr að því leyti að 42 prósent þeirra vilja að Landspítalinn fái óbreytt fé, 6 prósent þeirra vilja að fjárveitingar lækki, 20 prósent vilja að miklu meira fé verði varið í reksturinn og 32 prósent að aðeins meira fé verði veitt í reksturinn.

Könnunin var gerð dagana 17. til 23. ágúst í könnunarvagni Prósents, svarhlutfall var 52 prósent og 1.251 tók afstöðu til spurningarinnar.