Meirihluti áhafnar frystiskipsins Júlíusar Geirmundssonar Ís 270 hefur greinst með COVID-19. Þetta kom í ljós þegar sýni voru tekin úr allri áhöfninni þegar skipið kom til hafnar í gærkvöldi til olíutöku á Ísafirði. Skipið er gert út af Hraðfrystihúsinu – Gunnvöru hf á Ísafirði.

Fram kemur í tilkynningu frá útgerðinni að veiðiferðin hafi þá staðið í þrjár vikur og nokkrir úr áhöfn verið með flensueinkenni. Heilbrigðisstarfsmenn fóru um um borð til sýnatöku en enginn úr áhöfn kom í land.

Að sýnatöku lokinni lagði skipið úr höfn en niðurstöður úr sýnatöku komu ekki fyrr en nú undir kvöld. Þegar þær lágu fyrir var veiðum þegar hætt og skipinu snúið til hafnar, að sögn útgerðarinnar.

Er það væntanlegt til Ísafjarðar á morgun en enginn um borð virðist vera alvarlega veikur. Segist útgerðin eiga eftir ákveða næstu skref í fullu samráði við umdæmislækni sóttvarna á Vestfjörðum.