Þetta ævintýri hófst nú bara með góðum kaffibolla við stofuborðið heima í Köben þar sem við búum. Okkur dreymdi um að stofna eigið skófyrirtæki sem einblínir á gæði umfram magn – andstætt fjöldaframleiðslu, því okkur er ekki sama hvernig skórnir eru unnir eða úr hvaða efni,“ segir Bragi spurður út í ævintýrið sem hófst fyrir fjórum árum síðan.

Erla og Bragi fluttu til Kaupmannahafnar fyrir rúmum 22 árum, Erla til að spila fótbolta og Bragi handbolta. Þau gerðu bæði samninga við lið í Kaupmannahöfn og var ætlunin að prófa eitt ár fjarri heimahögum. Heimferðin hefur þó heldur betur dregist á langinn og hafa þau nú búið í Danmörku í rúma tvo áratugi og eru bæði löngu hætt í boltanum. Nú er það fyrirtækjarekstur og skóframleiðsla sem á hug þeirra allan.

Danskari en viðurkenna

„Það var aldrei planið að vera svona lengi í Danmörku en tíminn er fljótur að líða þegar það er gaman og manni líður vel. Alveg frá fyrsta degi höfum við kunnað vel við okkur í Kaupmannahöfn og erum við líklega orðin danskari en við viljum viðurkenna”, segir Bragi brosandi.

„Alveg frá fyrsta degi höfum við kunnað vel við okkur í Kaupmannahöfn og erum við líklega orðin danskari en við viljum viðurkenni."

Bragi

„Við héldum lengi út í boltanum. Ég spilaði í úrvalsdeildinni og Bragi fór yfir í þjálfun. Á þessum tíma var ég í íslenska landsliðinu í fótbolta og kom því oft heim og fékk því aldrei beinlínis heimþrá”, segir Erla.

Samhliða boltanum luku þau háskólanámi, Erla í iðjuþjálfun og Bragi viðskiptafræði. Eftir námið hóf Bragi störf í fata- og skóbransanum og ferðaðist víða um heim og kynntist þessum bransa vel.

„Ég byrjaði að vinna með skó fyrir 20 árum þegar ég vann fyrir skóframleiðanda samhliða skóla og þjálfun. Þetta fór vel saman og framfleytti okkur á þessum tíma. Eftir háskólanámið vann ég fyrir danskt tískufyrirtæki sem sérhæfir sig í fatahönnun, en nokkrum árum seinna lá leið mín aftur inn skóbransann,“ segir Bragi.

Nafnið JoDIs er samsetning úr nöfnum hjónanna; Jónatan og Anna Dís. Mynd/Martin Hojer

Nöfn barnanna


Það var svo árið 2016 að Bragi og Erla ákváðu að láta draum sinn rætast og stofna fyrirtæki með eigin framleiðslu og úr varð vörumerkið JoDis. Nafnið er sett saman úr nöfnum barna þeirra hjóna sem heita Jónatan Ari, 15 ára og Anna Dís fimm ára. Það má því segja að þetta sé sannkallað fjölskyldufyrirtæki.

Aðspurð hvernig það sé að reka bæði heimili og fyrirtæki saman svarar Erla að það hljómi kannski sem hálfgerð klisja að segja að það gangi vel en þannig sé það nú samt.

„Okkur semur vel og við sjáum hlutina með svipuðum hætti. Við erum dugleg að ræða málin og hlusta á sjónarmið hvors annars áður en við tökum ákvarðanir – nú og stundum erum við bara sammála um að vera ósammála,“ segir Erla í léttum tón.

Bragi og Erla gera sitt besta til þess að taka vinnuna ekki með sér heim, enda tíminn með börnunum mikilvægur en eðli málsins samkvæmt gengur það ekki alltaf eftir.

„Öll framleiðslan fer fram í litlu fjölskyldufyrirtæki í Portúgal undir stjórn fólks sem í dag er orðið kærir vinir okkar. Það skiptir svo miklu máli að vinna með fólki sem þú treystir og er á sömu bylgjulengd og maður sjálfur, brennur fyrir sjálfbærni, gæðum og að fara vel með,“ segir Bragi.

Samstarf við áhrifavalda


Árið 2016 þegar hugmyndin kviknaði voru áhrifavaldar áberandi og vinsældir þeirra vaxandi. Þarna sáu Bragi og Erla tækifæri til að byggja upp vörumerki sem að stórum hluta væri unnið í nánu samstarfi við áhrifavalda úr tískuheiminum. Í dag er stærsti hluti JoDis-línunnar hannaður í samstarfi við áhrifavalda.

Öll framleiðsla JoDis skólínanna fer fram í Portúgal. Mynd/Martin Hojer

„Það er ótrúlega auðvelt að staðna í tískubransanum og mikil áskorun að halda sér í formi eins og við orðum það. Með því að vinna náið með mismunandi fólki sem hefur sinn eigin stíl erum við alltaf að endurnýja okkur og fá inn ferskar hugmyndir.

Við viljum líka stofna til náins sambands okkar á milli – það er, ekki aðeins að fá áhrifavaldana til að auglýsa vöruna heldur hafa þá með í hönnunarferlinu öllu og merkja þær vörur sem eru framleiddar undir þeirra áhrifum, með þeirra nafni. Á þennan hátt fáum við hugmyndir og innblástur frá fólki sem lifir og hrærist í tískuheiminum og útkoman verður eftir því,“ segir Erla.


Seldist upp á mettíma


Frá upphafi hafa fimm áhrifavaldar komið við sögu framleiðslunnar. Fyrsta JoDis-línan var gerð í hönnunarsamstarfi með Mascha Vang sem er einn stærsti áhrifavaldurinn í Danmörku. Seinna kom lína með söngkonunni Stine Bramsen og á sama tíma kom fyrsta línan með Andreu Röfn Jónasdóttur, íslenskum áhrifavaldi.

Sú lína nefnist „JoDis by Andrea Röfn“ og sló í gegn á Íslandi og seldist upp á mettíma. Síðan hafa fjórar línur verið framleiddar í samvinnu við Andreu Röfn og viðtökurnar verið framar vonum að sögn hjónanna.

Línan JoDis by Andrea Röfn sló í gegn á Íslandi og seldist upp á mettíma og voru í framhaldi unnar fjórar línur í samstarfi við áhrifavaldinn. Mynd/Hlín Arngrímsdóttir

„Andrea Röfn hefur alveg einstakan stíl og yndislega nærveru. Samstarf okkar hefur verið frábært enda small hún inn í teymið okkar frá fyrsta degi,“ segir Bragi.


Nýr íslenskur hönnuður fyrir jól


Nú hafa yfir hundrað skótegundir verið framleiddar undir nafninu JoDis og í haust komu fyrstu barnaskórnir.

Fram undan eru spennandi tímar hjá fyrirtækinu og margir skór á teikniborðinu. Ný Andreu Rafnarlína er nú í framleiðslu auk þess sem nýr íslenskur gestahönnuður verður kynntur til leiks fyrir jólin. Þá er JoDis að vinna að nýrri línu með þekktum dönskum aðila sem verður opinberaður á næstu dögum á Instagramsíðu fyrirtækisins.

Fimm áhrifavaldar hafa komið við sögu framleiðslunnar og verður nýr íslenskur gestahönnuður kynntur fyrir jól. Mynd/Martin Hojer

„Það er ofboðslega spennandi að vinna með nýju fólki. Þessar nýju línur eru allar ólíkar, en sjúklega flottar hver á sinn hátt. Við erum sérstaklega spennt að kynna nýjan íslenskan gestahönnuð inn í teymið okkar og hlökkum til að sjá viðtökurnar,“ segir Erla að lokum.